المصري كيدز: «حدوتة».. «ماما حبيبتى»

فى بيت جميل هادى ومليان حب وحنان بيعيش فيه نور ونوره الاخوات الحلوين مع باباهم ومامتهم اللى ديما بيهم مهتمين، نور ولد شقى ودمه خفيف ونوره بنوته حنينه حدا وجميله، نور ونوره كل يوم الصبح اول ما يصحوا من النوم على طول على حضن ماما يقولوا صباح الخير وياخدوا منها الحب والحنان، ويقولها نور عايز أشحن بسرعه يلا يا نوره خلصى حضن ماما بسرعه.
ونوره تقوله سبنى شويه انا كدا مبسوطه، ويبتدى يومهم الجميل ولما يرجعوا من المدرسه بعد يوم طويل تكون مامتهم بأحلى الاكلات للغدا جاهزة، ولو حد فيهم قال الاكل دا مش عجبنى كانت تزعل وتقول دا انا بعمله ليكم بقالى كتيير، يرد التانى متزعليش يا ماما تسلم الايد، وشويه ويجى معاد التمرين ودا بقى وقت الهزار فى العربيه والرغى، اكيد نوره تفضل تحكى لمامتها على اليوم الجميل واصحابها البنات.
اما نور فيحكى على المتش والجول الخطير ولما يرجعوا البيت بعد المذاكره قوام على السرير تدخل مامتهم معاهم وتقول تصبحوا على خير وتحكى احلى حدوته اللى منها اكيد نستفيد، وكل يوم على كدا كان نور ونوره مبسوطين لحد ما جه يوم ومامتهم تعبت جدا والدكتور قالها اسبوع لازم تريح فى السرير، حس نور ونوره انهم مش مبسوطين وحسوا ان هما ناقصهم حاجات كتير واتفقوا وقرروا انهم لازم يساعدوا مامتهم عشان تخف بسرعه، وبدأت نوره تساعد فى البيت أما نور ينزل يشترى الطلبات.
وقدر نور ونوره يريحوا مامتهم لحد ما خفت وبقت كويسه وقررت تعمل ليهم مفجأه وراحت تخودهم من المدرسه جرى نور ونوره عليها وهما مبسوطين وقالوا ليها حمدالله على السلامه يا احلى ماما، فرحت بيهم جدا وشكرتهم انهم كانو بيها مهتمين وقدروا انهم يساعدوها انها تخف بسرعه، ردت نوره يا ماما احنا الى بجد متشكرين انت بتتعبى عشانا كتير وكل دا بيه مكناش حاسين، اما نور رد وقال من النهارده لازم نريحك شويه عشان متتعبش تانى وانا كل يوم هشترى طالبات البيت، فرحت جدا مامتهم بيهم وقالت ربى ليا يخليكم، ولما روحوا البيت حريت نوره على اوضه اخوها وقالت له عيد الام كمان يومين لازم ليه نكون جاهزين، عايزين نفرح ماما بأحلى هديه مننا احنا الاتنين.
قال نور نجيب ليها شنطه جديدة نوره قالت لا لا عايزين نجيبلها حاجه هى نفسها فيها وبتحبها، فكر معايا يا نور، رد وقال مش عارف ممكن نجيب ايه دخل عليهم باباهم وكان سمع الكلام، فرح بيهم جدا وقالهم انتم احلى اولاد وشجعهم وقالهم على افكار جنان، ونوره قالت ليه احنا هنحتاج انك توصلنا عشان نعمل لماما مفجأه ونزل معاهم واشترى نور ونوره احلى هديه، فرحت مامتهم بالمفجأه ديه، وقالت انتم احسن هديه هفضل اشكر ربنا عليها دايما، ردت نوره: وانت ماما حبيبتى ربى يخلكى ليا.