بيبو النهارده بقى صاحى مبسوط علشان مامته وعدته إنها هتخرّجه النهارده ويروح يلعب فى النادى وياكل الآيس كريم اللى بيحبه. ولما صحى كده وفاق، جرى على مامته وقالّها: صباح الخير، ردت عليه: صباح النور على بيبو الأمور اللى خلاص بكرة هيروح المدرسة أول يوم. تعالى يلّا بقى نشوف هنعمل إيه كل يوم لما نصحى من النوم، أول حاجة هندخل التواليت ونغسل وشنا وأسنانّا، وبعدين ماما هتكون محضّرة الهدوم، وتلبس اليونيفورم وكمان الشوز، وتدخل المطبخ تاخد ال«Lunch box» وتحطه فى الشنطة على طول. ونقعد نفطر سوا، وننزل فى معادنا مظبوط، وأنا هوصّلك أول يوم، وهقعد معاك شوية صغيرين لحد ما تتعرف على الميس بتاعتك وأصحابك الحلوين، وهاجى آخدك فى معاد الخروج وهتلاقينى أنا أول الحضور علشان هتكون واحشنى وبالى بيك مشغول. خلاص يا ماما عرفت إيه المطلوب منى كل يوم، ويلّا قوليلى إمتى بقى على النادى هنروح؟ أول ما تخلّص غداك، هنمشى على طول. وراح بيبو النادى وقعد يلعب فى منطقة الألعاب، وكان فرحان ومبسوط وأكل الآيس كريم، وأول ما مامته قالت يلّا يا بيبو علشان نروّح ننام، على طول كان سامع الكلام، وشكرها على الخروجة وإنها كانت أجازة ممتعة، وبقى خلاص مستعد إنه يروح المدرسة. وروّح بيبو البيت وهو فرحان، وحضّر شنطته واتعشى وجرى على السرير قوام، وحكتله مامته الحدوتة وقالّها: أنا نفسى الميس بتاعتى تكون اسمها «إلهام» زى الميس بتاعتك زمان. قالتله مامته: طب يلّا نام وبكرة نعرف اسم الميس والكلاس كمان. ورن المنبه الصبح فى الميعاد، وصحى بيبو أول ما مامته قالت مين هيقوم وعلى أول يوم فى المدرسة هيروح؟، قام بيبو وكان فرحان، وافتكر فيلم الكرتون اللى بيحبه بتاع السمكة نيمو، وقعد يتنطط ويقول: أول يوم مدرسة أول يوم مدرسة، ضحكت مامته وحضنته، وقوام عمل بالاتفاق وغسل الوش والأسنان، وجرى على أوضته وراح هووب ناطط فى اليونيفورم وبقى تمام، وكان ال«لانش بوكس» جاهز ومستنيه، وقوام راح فطر وشرب الحليب علشان يكون قوى ومركّز فى المدرسة. وراح بيبو ودخل الكلاس، وكان اسمه «كراب»، ولقى الميس واقفة بكل ترحاب، واتعرفت عليه وسألته عن اسمه وقالّها بيبو، والحقيقى بلال، قالتله أهلًا يا بيبو، أنا بقى ميس جيجى، والحقيقى جيهان. هكون مبسوطة قوى إنك معايا هنا فى الكلاس، هنقضّى وقت جميل ونلعب بالألوان، وعايزاك دلوقتى تقول لمامى يلّا سلام وما تقلقيش عليّا، أنا هنا مع ميس جيهان. وساعتها حضنته مامته وقالتله: فى أمان الله. وقعد بيبو فى الكلاس وكان شغال أغانى جنان، قعد يرقص مع أصحابه، ولعبوا شوية بالمكعبات. وشوية ونزل الجاردن ولقاها زى ما مامته قالتله، وقضّى وقت جميل واتعرف على أصحاب ولاد وبنات، وأول ما الوقت جه علشان الكل يروّح، لقى مامته مستنياه ومحضّره له مفاجأة جميلة، وكانت لعبة «بات مان». فرح بيها جدًا وقالّها إنه حب المدرسة وميس جيجى كمان، ومستنى بكرة ييجى بسرعة عشان يروحلها قوام. فرحت مامته جدًا وقالتله: إيه رأيك بكرة نعمل مفاجأة لميس جيهان؟، فرح بيبو بالفكرة، وقال: دى فكرة جنان.
