«يسرا» تعرضت للتنمر بسبب شعرها فافتتحت صالوناً ل«الكيرلى»

«منكوشة، سرحى شعرك، معندكوش فرشة فى البيت؟».. كلمات ونظرات ساخرة طالما تعرضت لها «يسرا» وصلت إلى حد التنمر وتشبيهها بالرجال.
وعلى حد وصفها «شعرى مكنش فيه أمل منه»، وهو إزعاج ظل يدور فى رأسها حتى انعدمت ثقتها فى ذاتها، وهو ما حاولت أن تعالجه بالقراءة التى قادتها لأن تتغير حياتها لتصبح واحدة من المتخصصين فى مجال الشعر الكيرلى، الذى أكسبها مناعة ضد استفزازات المجتمع وجعل منها شخصية مؤثرة عبر مواقع التواصل الاجتماعى، يلتف حولها كل الذين يعانون من نفس المشكلة التى عالجتها بالوقت وانتهت بما قالته «ثقتى فى نفسى زادت وشعرى طول واتحسن».
«مش كلنا مولودين شعرنا ناعم ومفرود».. كلمات وصفت بها يسرا وائل، معاناة الفتيات اللاتى ولدن بشعر مجعد يبدو هشًا نظرًا لطبيعته المنحنية، ويتعرضن لضغوطات مجتمعية وتنمر بشكل مستمر، وهو ما جعل أغلبهن يتجهن إلى تصفيف شعرهن بطرق الكيرلى المختلفة، والتى تحدثت عنها قائلة: «أول حاجة لازم البنت تعملها لو بتستخدم حرارة زى مكواة أو سشوار توقفه ولو فى أطراف مفرودة تتقص عشان تمشى على الروتين صح، وأساسى ننشف شعرنا بتيشيرت قطن أو فوطة ميكروفايبر لأن الفوطة العادية بتقصف الشعر وبتسبب له هيشان».
وأضافت: «العناية بالشعر لازم تكون ب(شامبو: لغسل فروة الشعر فقط وبنبعد عن الشعر نفسه، وبلسم: عكس الشامبو بيوضع على الشعر فقط ونبعد عن الفروة، و«ليف أن»، ده زى الكريم أساسى بعد الاستحمام يوضع على الشعر مبلول) ونبتدى نعمل الخصل بالشكل اللى إحنا عايزينه، البنات بتيأس من الروتين وتكراره، لكن هى مرحلة لحد ما الشعر يتعود ويكون كيرلى من غير مجهود».
صححت يسرا التى تخرجت فى كلية الألسن قسم اللغة الإنجليزية معلومة مغلوطة شائعة لدى الفتيات، كشفت عنها قائلة: «بنات كتير مخدوعة أن مدام الشعر طويل ميتقصش، لا لازم كل 4 أو 5 شهور يتقص الأطراف عشان هى اللى بتقصف باقى الشعر وتدمره».
أحبت يسرا الكيرلى حتى قامت رفقة شقيقتها مريم بإعادة افتتاح كوافير جدها إلى صالون أطلقتا عليه اسم «‏curled sisters» بمنطقة الدقى منذ عامين وهو مخصص لتصفيف الشعر الكيرلى، تقول: «المبهر أن العملاء مش بنات فقط، الولاد أيضًا يمكن أكتر من البنات، وده بسطنى إن الاهتمام بالكيرلى وصل لهذه المرحلة».
وأردفت: «أسعار تصفيف الشعر الكيرلى مش كلها واحد بتختلف على حسب طبيعة الشعر وطوله وكثافته لكن غالباً بتبقى من 250 ل400 جنيه».
ووجهت يسرا البالغة من العمر 24 عامًا نصيحة لكل الفتيات اللاتى يواجهن مشكلة الشعر المجعد، وقالت: «حبى نفسك بطبيعتك، متغيريش فيها عشان حد، شعرك لايق عليكِ زى ما هو سواء كيرلى أو مفرود وناعم سبيه لأن ده بيحدد ويبين شخصيتك».