المصري كيدز: حدوتة.. «بائع الفاكهة»

فى شارع هادى وجميل مليان بالشجر والعصافير ساكن ياسين جنب محل صغير بيبيع فيه عم سعيد فواكه. عم سعيد كل يوم الصبح يفتح محل الفواكه ويقعد يلمع فيها ويظبط فيها بأشكال جميلة، والفاكهة بألوانها بتكون خطيرة أى حد يشوفها يقول الله الفاكهة دى شكلها جميل ويشترى منها كتير. عم سعيد كان أهم حاجة عنده إنه يخلى شكل الفاكهة حلو عشان تلفت ليها الأنظار، والناس تشترى منه كتير ويبقى معاه فلوس ويجيب كل اللى نفسه فيه. وكل يوم الصبح وياسين نازل المدرسة بيشوف عم سعيد وهو بيظبط الفاكهة ويقول له الفاكهة شكلها جميل يا عم سعيد، وفى يوم كان جاى ضيوف عند ياسين فى البيت مامته قالت ليه انزل اشترى فاكهة عشان الضيوف بس متجبش من عند عم سعيد هات من المحل التانى.
سألها ياسين ليه يا ماما دى الفاكهه عند عم سعيد شكلها أحلى كتير، ردت عليه شكلها من برا بس لكن من جوه غير كده. نزل ياسين يشترى طلبات البيت وقعد يبص على الفاكهه عند عم سعيد شايفها حلوه جدا وشكلها جميل ولما راح للمحل التانى وكان صاحبه مش مهتم قوى إنه يخلى شكل الفاكهة حلو زى عم سعيد، قال إزاى ماما عايزه تجيب من هنا دى أكيد فاكهة مش تمام، أنا هجيب من هناك، عم سعيد بشوفه كل يوم وهو بيظبط الفاكهة ويلمعها إزاى مش هتكون حلوة. وفعلا اشترى ياسين الفواكه من عم سعيد وطلع البيت غسلت مامته الحاجة وقدمتها للضيوف، ولسه الضيف بيفتح أول تفاحة لقاها من جوا سودا ومش تمام، أما البرتقال فكان حادق والموز والفراولة والكيوى كمان، اتكسفت جدا مامته وقالت للضيف هقوم اعمل شاى ودخلت سألت ياسين إنت جبت الفاكهة من محل عم سعيد؟، خاف يقول الحقيقة وقال لا أكيد.. قالت له يبقى لينا كلام بالليل.
مشى الضيف وندهت مامة ياسين عليه وقالت ليه شوف الفاكهة من جوا عامله زاى، مش كل حاجة شكلها حلو من برا بتكون من جوا تمام، واحنا أهم حاجة نكون جوانا حلو ودا من برا علينا هيبان، مش نكون زى عم سعيد نهتم بالشكل ونلمع فيه لكن من جوانا نكون بنكذب كمان. اتكسف ياسين وقال لها عندك حق أنا آسف عم سعيد خدعنى بشكل الفاكهه الجنان أنا هنزل أرجعها ليه ويرجع الفلوس حقها كمان. نزل ياسين ورجع الفاكهة لعم سعيد وقاله كدا اسمه غش أكيد، وزى ما بتهتم بشكل الفاكهه من برا اهتم تجيبها كويسة عشان تعجب الناس من جوا كمان وتبيع كتير وتكسب أكيد. سكت عم سعيد وقاله عندك حق يا ياسين أنا كنت مستغرب ليه الناس مش بتشترى منى زى المحل التانى مع إنى بهتم جدا بشكل الفاكهة بس عمرى ما اهتميت بالطعم كمان. واتعلم عم سعيد الدرس، بدأ يهتم بجودة الفاكهة بتاعته زى ما بيهتم إنه يقدمها بشكل كويس، لحد ما الناس عرفت إن الفاكهة بتاعته بقى طعمها جنان مش شكلها بس، وبقى عم سعيد فرحان ومبسوط بعد ما عرف إن الحاجة لما تكون حلوة من جوا هو دا فعلا اللى خلاه سعيد.