السيسي: «أتمني من زملائنا الإعلاميين اللي ردوا في موضوع سيناء ميهاجموش لكن يتكلموا بمعلومات»

قال الرئيس عبدالفتاح السيسي، إن الأيام الماضية شهدت نقاشا حول سيناء. وأضاف: «أنا مش عايز أتدخل فيه أوي.. فيه مقالة اتكلمت عن سيناء وعن إمكانية الاستثمار، طرحت أفكار، وكل الكلام اللي اتقال مقدر ومحدش أبدا يقدر يقول له أهداف»، في إشارة إلى مقال «نيوتن» حول سيناء المنشور في «المصري اليوم».
وأضاف السيسي على هامش افتتاحه عددًا من المشروعات القومية لخدمة التنمية في سيناء: «كنت أتمني اللي عايز يرد يكون على علم بما نفعله.. نحن خلال 6 سنين ماذا فعلنا بسيناء؟.. إحنا صرفنا أرقام هائلة.. لما نتكلم عن سيناء كأرض 60 ألف كيلو 6% من مساحة مصر.. هل فيه حد مع كل احترامي وتقديري لرجال الأعمال والمستثمرين مستعدين ينفقوا ويعملوا طريق زي طريق شرم الشيخ أو طابا؟، أو النفق يكلفه مليارات كتير؟، لو اتعملت مش هتجيب تكلفة صيانته».
وتابع السيسي: «إحنا مهتمين بأننا نعمر سيناء بأنها تجتذب حجم من السكان اللي في الدلتا والصعيد بعد تعميرها».
واستطرد الرئيس قائلا: «زمايلنا في الإعلام لو عايزين يردوا على حد بيتكلم، يقولوا مين ده اللي يدفع 600 مليار جنيه عشان يعمل بنية أساسية وعوائدها أمن قومي والأمن القومي لا يقدر بمال».
وتطرق الرئيس إلى مشروع البيت البدوي في سيناء، قائلًا: «أقول لكل المصريين اللي بيسمعموني مشروع البيت البدوي تكلفته تقريبا 6 مليارات جنيه، لو حسبنا بالراحة عددد المستفيدين بنتكلم تقريبا في ألفين، لكل أسرة 3 ملايين جنيه. قولوا لي مين يعمل كده؟ هناخد كام؟ نص المبلغ ده؟».
وأضاف الرئيس: «بقول كده عشان ده مهم عشان تعرف لما تيجي تعمل تنمية حقيقية في سيناء ده كلام محتاج أرقام هائلة، انت بتتكلم في ألفين بيت، طيب لو أنت عايز تسكن 50 ألف بالطريقة دي؟ وتديله 5 أفدنة علشان يزرع ويعيش هو وأسرته بشكل لائق، وعلشان مكافحة الإرهاب، 3 ملايين جنيه للبيت الواحد».
واختتم الرئيس: «بقول كده علشان كنت أتمنى من زمايلنا اللي اتكلموا عن التنمية في سيناء، الكل هاجم كده، وقالوا ده شغل ترتيب، لا.. لا، البيانات دي متاحة، وعلى موقع الرئاسة فيه كل كلمة بتتقال هنا دلوقتي،كله على الموقع بتاعي، ادخل واتكلم ورد واعمل سياق فكري اقتصادي اجتماعي إنساني، وتقولوا للناس اللي عايز يتكلم على سيناء ويفكر فيها إحنا بنعرض عليك اللي إحنا عملناه، لو عندك زيادة تقدر تقول لي الموارد هتجيبها منين، أنا هبقى سعيد وأسمع منك وأستفيد».