وثيقة حقوق الانسان المصرى

بعد الفشل الذريع اللى فشلته المليونية اللى حاولنا نعملها عند كوبرى ابو المطامير فى البحيرة للضغط على المجلس العسكرى وطلب تعيين مجلس رئاسى اللى انا تكرمت و تعطفت بعد الحاح جماهيرى انى اقبل اكون عضو فيه رغم ان ده هيضيع على فرصتى فى الترشح للرئاسه ولأنى مصمم اختار لبلدى الطريق الصح على طريقتى بغض النظر عن راى عامة الشعب اللى مش عارف مصلحته و ده طبعا من خلال الشرعية اللى اكتسبتها كونى كنت اول واحد اعلن ترشحه للرئاسة من خلال الفيس بوك فى يوليو 2007 و اللى مش مصدق ممكن يشوف اللينك ده
http://www.facebook.com/home.php?sk=group_128549957188422&ref=ts
المهم ايمانا منى بإنى لازم يكون ليا دور فى الوضع الجديد لبلدنا قررت اعمل وثيقة لضمان الحريات تكون فوق القانون و فوق الدستور نفسه بحيث انه لا يمكن تعديلها ابدا حتى لو طلب كل الشعب ذلك على ان تكون بنودها كالاتى :
يمنع منعا باتا القاء اى نوع من انواع النكات على الصعايده او البورسعيدية او حتى الفلاحين او الشباب الفرافير لان ده يعتبر تفرقة عنصرية .
الغاء مادة التربية الدينية سواء الاسلامية او المسيحية من جميع المناهج الدراسية و تدريس مادة مشتركة بين الديانتين علشان منفرقش بين مسلم و مسيحى
من حق كل شخص مسلم تربية دقنه على الا يزيد طولها عن 5 سم كما يحق للمسيحى ارتداء صليب لا يزيد قطره برضه عن 5 سم
رفع الحد الادنى للاجور ل 10000 جنيه (عشرة الاف جنيه ) ولو الحكومه ممعاهاش تستلف من البنك الدولى ماهو اصله اهبل و بيسلفنا بدون شروط
من حق اى مواطن ان يتطاول على اى وزير او رئيس وزراء او حتى رئيس جمهورية فى حالة اننا حسينا انه من النظام القديم و يعتبر هذا المواطن من الفلول اذا كان التجاوز فى حق شخص من المؤيدين ليه
من حق اى مواطن ضرب اى ضابط شرطه و رفض ابراز هويته او رخصة القياده لاى كمين و مفيش مانع انه يضرب الضابط قلمين (ما هم ياما ورونا)
يتم تمرير اى قرار مصيرى للدولة عن طريق الاستفتاء الشعبى فى حالة اتفاقهم مع ارائنا و فى حالة اختيار راى اخر نعتبرهم جهلاء و غير مستعدين للديمقراطية ويحق للجبهة الثورية النزول للتحرير لتنفيذ رغبتها مهما كان التمن .
عمل جميع الاستفتائات و الانتخابات القادمة عن طريق حساب الفيس بوك او التويتر الشخصى بكل مواطن و ذلك لضمان الشفافية و النزاهة .
الحجاب عادة غير منطقية خاصة لو المرأه مش متعوده تلبسه من لحظة ولادتها يبقى ليه تلبسه على كبر .
الاخوان فصيل من المجتمع ولا يجب اقصائه طالما انه يساندنى لكن فى حالة تغيير موقفهم فانا اخشى على البلد من ان يصلوا للحكم
على الحكومه الاستماع لمظاهرات جبهة الثوار و تنفيذ مطالبهم وفى نفس الوقت تجاهل اى مطالب اخرى سواء من اقباط او سلفيين او عمال او فلاحين لانها مطالب فئوية.
الغاء نسبة العمال و الفلاحين من البرلمان لان معندهمش حسابات على تويتر.
اتباع القائمة النسبية فى الانتخابات وده لضمان اننا نحصل على شوية مقاعد فى الانتخابات بما اننا النظام الفردى يعنى عدم حصولنا على اى مقعد .
فى حالة الحاجة لاجراء اى تعديل او اضافة لهذه البنود يكون مره كل 3 شهور لانى بقيت الوقت بكون مسافر و مش فاضلكم .
هذا والله الموفق
المرشح لرئاسة الجمهورية
الاستاذ الدكتور البروفسير العلامه
احمد صبره