سرقة «المسمط» المركزى

المعقول والمنطقى فى بلادنا يقول إنه بإمكانك لو إنت نائب فى البرلمان أن تهبر ملايين أو مليارات من صدقة علاج الغلابة.. وها يطلع مسؤول يقول حولناهم لأولياء أمورهم عشان يزعقوا لهم.. وبس وخلاص والفلوس مش هاترجع محصن وحلال عليك يا عم.. ولو إنت رجل أعمال جامد يمكنك أن تهبر من البنوك شوية قروض على ما قسم وتاخدها وهى سخنة بنار الفرن وتخلع قوام قوام على بلاد تركب الطائرات الجامبو..
ولو إنت مسؤول برضه فى مركز حكومى وغاوى وشاطر تقدر تاخد عمولات كده سمسرة كده كام فدان كده وكام شقة كده وكام شاليه كده كده وتطلع بشوية حلوين ومن غير ما تسيب الوطن وتهاجر عشان إنت بتحب مصر.. كل ده وغيره حاجات كتير من الممكن أن تكون معقولة ومنطقية..
لكن أن تعرف أن موظفة على قد حالها فى البنك المركزى بتعمل جمعيات مع الموظفين أصحابها وهى على درجة ممتازة حسب التقرير الإدارى وتهبر كراتين فلوس لمدة شهرين ولما ينكشف الأمر تكون بعزقت اتنين مليون و800 ألف جنيه، جديدة نوفى الحكاية دى السيدة الموظفة تعمل فى حاجة اسمها «خزينة الاستبدال» ويبدو على قد ما فهمت أن هذه الخزينة هى المكان الذى يتم فيه استبدال العملات الورقية المتهالكة بعملات جديدة نوفى ملفوفة بالأساتك ومحطوطة فى كراتين.. وهذه السيدة الموظفة مسؤولة عن الخزينة وهى عهدتها ومعها مفتاحها وغير مفهوم بتاتاً أن تجد هذه السيدة نفسها فجأة مديونة بسبعة ملايين وشوية، راحوا فين؟ خسرتهم إزاى؟ وإمتى؟ الله اعلم.. ومش مهم..
المهم سرقت فلوس خزنة مطبعة البنك المركزى المصرى إزااااي؟؟؟ بسيطة جداً دخلت الشغل ومعاها كيس فى الشنطة الراجل الغلبان راخر اللى على باب «المسمط» قصدى «الفرن» يوووه قصدى خزينة البنك بص فى الشنطة وسألها قالت له يا أخويا ربنا ما يحرمك من عافيتك أصل أنا عيانة وكل الأدوية دى اللى هى مالية كيس نايلون هاآخذها أثناء العمل.. الراجل صدق لأنهم حطوه فى هذا المكان عشان طيب ولا يشك فى أى إنسان ولو شك فى كيس الدواء لن يفهم أى علاقة بين الكيس وبين «المسمط» الذى يحرسه هو.. يعنى لا تفتيش ولا مفهومية ولا اهتمام..
توالت الأخبار فى الصحف.. واحد قال أصل هما بيفتشوا الرجالة بس تفتيش ذاتى والستات لأ عشان عيب، وواحد قال مافيش تفتيش من أساسه غير إنهم يبصوا فى الشنط.. والنيابة عندما ذهبت للمعاينة لم تجد أى كاميرات للمراقبة داخل خزينة الاستبدال هذه.. ووجدت أن غالبية السيدات الموظفات يرتدين ملابس فضفاضة واسعة تسمح بإخفاء أوراق البنكنوت بكميات حلوة دون أن يظهر منها شىء، وعملت تجربة كمان..
واحد موظف بالصدفة بعد شهرين من تحويل الفلوس إلى خارج «المسمط» المركزى جاله هاتف قال له ماتبص على الكراتين دى يا جدع كده.. بص.. لقى كرتونة منقورة من الحرف كده وقرر أن يفحصها لقاها ناقصة 4 لفافات كل لفة بميتين ألف يعنى 800 ألف جنيه.. بلغ.. قالوا مابدهاش.. نفتش ونعمل جرد مع إن الواحد تعبان وحران وزهقان.. اكتشفوا إن فيه اتنين مليون تانى مسروقين وبعد التحقيقات والذى منه اعترفت السيدة وخلاص..
ومما يلفت النظر أن هناك 170 ألف جنيه عملات متهالكة قالت السيدة إنها أعدمتها إزاى؟ قطعتها حتت كده ورمتها وخلاص.. والله العظيم ده «مسمط» وعشان ماتزعلوش «مسمط مركزى» وليس فرن أو طابونة لأ.. لأ..
لأن لو جنابك شايل معاك فى العربية نص شيكارة دقيق بلدى مدعم والضابط شك فيك وفتشك ولقى الدقيق هاتروح فى داهية لكن لو خرجت من «المسمط» المركزى لحفظ لحمة الرأس واللسان والجوهرة بكام رغيف مليانين عادى جداً.. أنا لو قاضى أدى الست دى براءة وأسجن القائمين على هذا «المسمط» وعلى إدارته ونظام أمنه بتهمة إهمال أفضى إلى تسهيل السرقة وكمان دون توعية الموظفين على كيفية الهروب إلى لندن.