سيدنا الاستفتاء!

من يوم جمعة الغضب التانية -27 مايو- واتفتح تاني جدل الاستفتاء بشكل مستفز جدا, وكل ما حد يطالب بحاجة يشهروا في وشه ال"نعم"!, ومرة يقولولنا انتوا قلتوا نعم للجيش ومرة نعم للحكم الديني ومرة نعم لنكهة شيبسي بالجمبري!, وبقينا حاسين ان الشعب اتضحك عليه ووقع نعم على بياض!!!... وبقى تقريبا كل المعترض على اي حاجة يقولوه احترم الاستفتاء الديمقراطي!.. قالك استفتاء ديمقراطي!!.. أنا مش هاكون من المتشائمين اوي اللي قالوا ان الناس نزلت اصلا عشان تدافع عن الدين في معركة وهمية, بس هاكون من المعتدلين واقول ان تونس رفضت فكرة الاستفتاء اصلا, ثم فرض جدل الاستفتاء -اللي نسبة لا باس بها من الشعب لاتعرف حتى الان على ماذا كانت تصوت- اقول فرض جدل كان استفتاء ديمقراطي حقيقي بلا تضليل, ونتائجه اوصلتنا للي احنا فيه دلوقتي وبكلمة اللي احنا فيه اقصد حالة البلد كده كلها على بعضها باقتصادها بامنها بفتنها بباباغنوجها, نعمل بقى زي جيش ليبيا ونقول تولع البلد عشان شخص -أو في حالتنا هنا- تولع البلد عشان استفتاء عقيم صوتوا عليه الاغلبية من غير مايكونوا فاهمينه؟, نموت نموت ويحيى الاستفتا؟؟؟, مش كل اللي بيحصل ده يدي مجال كبير للتفكير مرة تانية؟... وبعدين الناس ما اعترضتش عليه اول ما ظهرت نتيجته, اعترضت لما لقوا ان حتى الاستفتاء نتيجته ما اتحققتش واتعمل اعلان دستوري بمواد تشمل حاجات كتير جدا -منها مواد بتنظم حاجات بعد خمس سنين!!!!!- ماحدش خد راينا فيها!, وبعدين بجد نستنى ايه طيب, نستنى نبقى لبنان بفتنة طائفية بين الشعب والشعب, ولا نستنى فتنة بين الشعب والجيش؟ ولا نستنى البلد كلها تخرب بدون تفاصيل المهم بس يبقى فيه تل نقعد عليه في الآخر؟