ولاد البطة السودة

أنا مصري، والله العظيم مصري، وحياة أمي مصري، بلاش تحلف بأمك، مش علشان الحلف بغير الله غلط، لا طبعا متفهمش غلط، علشان أمك البطة السودة، يعني أيه تكون ابن البطة السودة؟
يعني تكون فعليا بتفيد البلد أكتر من 10 أشخاص عايشين جوه مصر وبرده رأيهم فيك إنك خاين، مش بتحب البلد، صوتك يتباع لأي واحد، معملتش حاجة للبلد.
المغتربين بره مصر حوالي 8 مليون، يعني تقريبا عشر تعداد مصر، ال8 مليون دول تحويلاتهم المالية من العملة الصعبة هي رابع أهم مصدر للدخل في مصر، يعني محدش جاب سيرة الناتج المحلي لل85 مليون اللي عايشين جوه مصر كأحد موارد الدخل القومي، بس مش مهم، انت ابن البطة السودة
المغتربين بره مصر مش بيستفيدو من دعم القمح والمواد الغذائية والكهربا وكل المستهلكات المدعومة، يعني بيوفرو على البلد عشر ميزانية الدعم، بس مش مهم، انت ابن البطة السودة
المغتربين بره مصر بيوفرو وظائف عمل للي جوه مصر بطريقة مباشرة عن طريق المشروعات اللي بيستثمرو فيها، وبطريقة غير مباشرة عن طريق عدم شغلهم للوظائف اللي كانو هيشغلوها لو فضلو جوه مصر، ده غير إن الموظف فيهم وواخد أجازة بيدفع تأمينات تعتبر من موارد الدخل لوزارة المالية، وحتى الداخلية بتاخد منهم تصريح عمل حتى لو مكانوش بيشتغلو في مصر، اصل الداخلية دي عاملة زي اخوك من الأم، لازم يشاركك في الميراث، يعني توفرلهم فلوس ووظائف وبرده مش مهم، إنت ابن البطة السودة
المغتربين بره مصر بيقللو الحمل على البنية التحتية المتهالكة، لا بيستخدمو شوارع ولا صرف صحي، يعني التكدس والاعطال هيقل بنسبة العشر، بس مش مهم، انت ابن البطة السودة
المغتربين بره مصر من وسائل الضغط اللي ممكن تستخدمها مصر لتمرير مصالحها وسياساتها، وكمان صورة مشرفة لمصر، بس مش مهم، انت ابن البطة السودة
كل اللي عايزينه ولاد البطة السودة إنهم يتعاملو زي باقي ولاد البلد، عايزين ننتخب، انتخابات مجلس الشعب الحاية أهم انتخابات في تاريخ مصر، هي اللي هتحط الدستور، هي اللي هتحدد سياسة البلد بخصوص المغتربين، طب إزاي هننتخب بدون انتخاب الكتروني؟ بلد زي الكويت فيها 600 الف مصري، هيعملولهم لجان فين؟ ولا هيعملو لجنة واحدة علشان مفيش قضاة كفاية؟ طب الكويت بلد صغيرة هيعملو أيه في أمريكا اللي فيها مدن بتسافرلها بالطيارة 6 ساعات؟ ولا هيحطوا لجان في المدن اللي فيها تجمعات كبيرة بس؟
المجلس العسكري بيقول اننا هننتخب، والناس جوه مصر بتقول انهم مش هيسيبونا وهيطالبو بحقنا، بس أنا عقلي المحدود مش قادر يستوعب إزاي هننتخب بدون انتخاب الكتروني وقدام قاضي مع إن مفيش قضاة كفاية؟ يكونوش ناويين يسرو بينا من الغربة لحد لجنة الانتخابات ويرجعونا في نفس اليوم؟ عصر المعجزات انتهى، وحتى لو هيقدرو يعملو كده أنا واثق إنهم مش هيعملوها، علشان احنا ولاد البطة السودة