بعد ما رجع فكرى واشترى كل أدوات المشروع بتاعه، راح بص على النتيجة، لقى إنه خلاص فاضل كام يوم على عرض المشاريع. ساعتها قال: الوقت جرى منى وأنا لازم أحقق المطلوب. أما فكرية فكانت قربت تخلص وأنجزت كتيير، وعملت أشكال حلوة جدا وجديدة كمان ما حدش عملها قبل كدا، لأنها كانت بتقضى أكتر الأوقات فى الورقة الذهبية اللى عَرّفتها معلومات كتير عن الخرز والأشغال اليدوية. ونزل فكرى الجنينة وبدأ يزرع الأحواض وينظم أوراق الشجر. شافه جارهم الحج شوقى (راجل كبير وعجوز عايش مع مراته شوقية)، نده عليه الحاج شوقى وقاله إنه ملاحظ إنه مهتم بالزرع والجنينة، وإن الجناينى اللى عنده فى أجازة لمدة شهر، وطلب منه إنه يعتنى بالجنينة بتاعته وياخد أجر الجناينى لأنه تعب ومبقاش يقدر يعتنى بيها بنفسه. رد فكرى بس دا واجب عليا، أنا كل يوم هاجى أرويها وأشوف المطلوب، رد عليه الحج شوقى: دا حقك يا فكرى، أنا هاخد خدمة وأنت هتاخد فلوس مقابل الوقت والمجهود. عجب فكرى الموضوع وقاله إنه هيستأذن أهله ويرد عليه على طول. ودخل لباباه ومامته وحكى ليهم الموضوع وقالهم إنه رفض الفلوس، لكن الحاج شوقى مصمم على الموضوع. وافق باباه وقاله: بس الشغل التزام، وإنت لازم تكون مسؤول، وأنا هشجعك عليه، ويلا من دلوقتى فكر هتعمل إيه بأول مرتب تاخده من شغلك وف إيه هيكون مصروف. وجت الست فكرية وقالت: يعنى هو يشتغل وياخد فلوس، وأنا أقعد لاويه البوز؟ قالتلها مامتها: إنت لسه صغيرة يا فكرية، لما تكبرى شوية. وراح فكرى لجنينة جارهم وبدأ الشغل على طول واتفق معاه إنه هياخد المرتب بالأسبوع. وخلص فكرى شغل اليوم، وراح تابع زرع المشروع وجهزه للمسابقة، وكان سعيد وفرحان إنه بقى يشتغل، وحس بثقة فى نفسه وفخر، وعرف وقدر قيمة الوقت، وندم إنه من أول الأجازة بيه ما استفدش. وعدّا اليوم من غير آيباد ولا تليفزيون، وقعد فكرى يفكر هيعمل إيه بالفلوس. وعدّا يوم ورا يوم وهوب خلص الأسبوع، وأخد فكرى الفلوس وقعد محتار يجيب بيها لعبة ولا هدية لمامته عشان يشكرها على مجهودها وإنها خلته يكون مسؤول. وقال: أول ما تيجى فكرية هاخد رأيها فى الحال. وشوية ودخلت فكرية وجابت معاها شوية من أشغالها اليدوية بتاعتها علشان توريهم لفكرى، وكان هو بيلعب بلاى ستشن. شوية وسألته: إنت خلاص جاهز للمسابقة بكرة؟ رد عليها وقالها:كله تمام، وأخد رأيها فى موضوع الهدية، واتفقوا إنها هتشاركه فى هدية مامتهم لما تبيع إكسسواراتها، وراحت علشان تجهز للمسابقة، وهنشوف فى الحلقة الجاية مشاريع فكرى وفكرية اللى هتكسب ولا الناس التانية.
