سأل الرئيس عبدالفتاح السيسي وزير النقل، المهندس كامل الوزير، عن محور «أم زغيوي»، قائلا: «كان اللواء كامل الوزير يتحدث معي في مشروع أننا نوسع محور 26 يوليو، فقلت له ما انتوا عندكم محور آخر ما نعمله المحور ده موازي ليه ينهي التعدي على كينج مريوط، وهذا معناه إن السيد المحافظ واللواء كامل الوزير وكل المعنيين بالدولة بشأن هذا الموضوع يقوموا بتقنين الأراضي اللى اتخدت من كينج مريوط وده ميتعملش غير لما يتعرض عليه لأني هرجع بحيرات مصر تاني زي ما كانت». أضاف، خلال افتتاح مشروعات الصوب الزراعية في قاعدة محمد نجيب العسكرية، السبت: «بالنسبة للناس إلى بقي ليها وضع موجود هناك، قلت يتعرض على الموضوع ولا يقنن الوضع في الأراضي المتعدي عليها في كينج مريوط إلا بعد العرض على، ثم يتعمل المحور الموازي ل26 يوازي وأم زغيوي يقطع لي الحد الخلفي للتعدي الموجود على كينج مريوط». تابع: «انا بقول لمن يسمعني ان المستفيدين من الأراضي في كينج مريوط اللى اتخدت واللي هنقبل انها يتم التقنين لها الفلوس هناخدها كاش، هاخد الفلوس لتقنين الاراضى في كينج مريوط إلى هنوافق عليها وهي جزء محدد سنأخذه كاش، انا مش هعمل محور يكلفني 2 أو 3 مليارات جنيه وحضرتك تستفيد منه وانت واخد ارض متعدى عليها، الكلام ده في مصر انتهى». مضى قائلًا: «كلام إن البلد دي أراضيها تتاخد كده، والله المفروض ما في محافظ يسيب متر أرض لأحد، لا أحد يتصور انني ضد حد، لا والله أنا ضد الفوضى وضد الاهمال وضد اللادولة، لكن انا والله ما ضد حد خالص، كل الناس في مصر أهلي وحبايبي وأخواتي، والله انا بقولكم اسمعوها مني، الناس بتعمل في الدولة اللى هي عايزاه وده لا يليق بنا، انت تاخد ليه حاجة مش بتاعتك، وانا أسيبك تاخدها ليه، أمال احنا قاعدين نعمل ايه كلنا، مش انا بس يا جماعة، احنا كلنا مع بعض، احنا قاعدين نعمل ايه، فارجوا موضوع كينج مريوط ده، وما أعرفش يا إيهاب انتو هتنزلوا الكراكات بتاعتكم امتى».
