عفو مين وسماح مين احنا فينا من الكلام دا ؟؟؟!!!!

جائنا البيان التالي
مبارك يطلب العفو والسماح
عفو مين وسماح مين ورباب مين والناس نايمين
وبيقولك كمان تم الافراج عن سوزان مبارك بعد ما دفعت 20 مليون جنيه جنييييييه مش دولار حتى ايه التهريج دااااااا ؟؟؟؟؟!!!!!
وبعدين ايه حكاية جس النبض اللي شغالين فيه دا ، مرة يطلع خبر منع التصويت للمصرين في الخارج في انتخابات البرلمان ولما رفضنا الخبر تاني يوم طلع انه اشاعة ودلوقتي يطلع خبر ان مبارك هيعتذر بردو علشان يجسو نبضنا ويشوفو لو قبلنا يكملوا في الموضوع ولو رفضنا يقولوا اشاعة لاء بقا هي اخبار جس النبض دي هتفضل كتير كدا ولا ايه لو كنتوا فاكرين اننا نمنا ويأسنا ورضينا بالامر الواقع لاء احنا مصحصحينلكوا عقولنا اوي وحاطين عينينا في وسط راسنا واللعبة دي مش هتخيل علينا تاني ومش هنتنازل عن حقنا مهما حصلللل
احنا عملنا ثورررررة عارفين يعني ايه ثورة ؟؟؟؟؟
يعني شهداء يعني ملايين كانت بتنام في الشارع 18 يوم بحالهم في عز البرد يعني ناس عندهم سرطانات ومش لاقيين مصاريف العلاج يعني ناس انضربوا مطاطي وبقوا بعاهات مستديمة ناس كتير ضحت بحياتها علشان مصرعلشان حياة كريمة علشان كرامة علشان محدش يذلنا تاني
حد يقولي بقا هل دا ممكن يتحقق لما نتنازل عن أبسط حقوقنا في اننا نحاسب ونحاكم اللى اهدروا كرامة وسرقوا وجوعوا الشعب
انا نفسي افهم حاجة هو مش المفروض زي ما بنسمع ان مبارك قيد الاقامة الجبرية وبيتحقق معاه
هو فيه حد قيد الاقامة الجبرية وقيد التحقيق بيسمحوله انه يسجل خطاب اعلامي يأثر بيه على الرأي العام ؟؟؟
لو دا مسموح يبقا كل الناس الغلابة اللى سرقت ملاليم علشان مكنتش لاقيه قوت عيالها ولا علاجهم ولا تعليمهم ولا البيت والحياة الكريمة واتسجنوا واطمرمطوا هما اولى يطلعوا يسجلوا خطابات اعتذار بقا ونشوف مين اولى ان الناس تعفو عنه مع أني متأكدة أنهم باسوا الايادي واعتذروا علشان يعفى عنهم ومكنش حد بيعبرهم
ايه رايكوا نسئل اهالي الشهداء نسئل الأرامل ونسئل الأيتام اللي عائلهم ومصدر دخلهم الوحيد استشهد ومات في احداث الثورة أو مات قبل الثورة في أقسام البوليس علشان كان بيقول كلمة حق أو مسجون دلوقتي ومش لاقيه اللى يعفو عنه نسئلهم ونشوف هيسمحوا بالعفو عن مبارك ولا لاء هيسمحوا بالتهريج والمهزلة دي تحصل ولا لاء
بصرف النظر ان مبارك لازم غصب عنه مش بمزاجه يرجع الفلوس لانه دي فلوسنا مش فلوسه وهو مش هيمن علينا بيها مقابل العفو عنه احنا حتى لو معفيناش عنه هو لازم يرجعها غصب عن عينه ومش هنتنازل عن حقنا سواء الحق دا مادي باسترجاع الفلوس او حق معنوي بمحاكمته ومحاسبته وعقابه وألا بقا محدش يلوم الا نفسه لما يجيلنا واحد ألعن منه يسرق تاني ويجوع الشعب ويصدر اوامر بقتل دا وحبس دا ونفي دا وهو عارف ومتأكد اننا بكل بساطة في الاخر هنقبل اعتذاره وناخد شوية ملاليم بعد ما يكون غطى نفسه وسرب وهرب كل ممتلكاته برا وكتبها بأسماء ناس تانيه
حقنا مش هنفرط فيه وحق ودم الشهداء مش هنفرط فيه الحق حق والمبادئ مبتتجزئش وانا مش هقبل بغير الحق بديل