لف وارجع.. تانى!

دار هذا الحوار قبل يوم الزحف.. ومع ذلك زحف من زحف، ورفض من رفض.. الذين زحفوا ظنوا أن الثورة انتصرت.. والذين امتنعوا كانوا يخافون من فخ كبير.. ولم يسلم القاعدون من الاتهامات.. إليكم نص الحوار:
- استعدوا يا شباب عاوزين نزحف على فلسطين!
- طيب مش لما نزحف هنا فى مصر الأول!
- لازم نحرر القدس.. نسيت فريضة الجهاد؟
- أيوه بس لازم نحرر مصر.. وتنتصر ثورتنا.. بعدين نروح أى حتة!
- ازحف يا مسلم.. ازحف يا مؤمن.. كلنا جند الله!
- على فكرة القدس مش قضية دينية، ولا إسلامية فقط.. إنت فاهم غلط!
- إنت شكلك حاجة من اتنين.. يا إما فلولى، يا إما ذيولى!
- والله لا فلولى ولا ذيولى.. أكتر حاجة دلوقتى الاتهامات!
- فلول النظام كتير.. شفت اللى كاتب لف وارجع.. يا ريس!
- تفتكر كان عاوز مبارك يرجع.. ولا كان خايف يرجع!
- العنوان بيقول إيه؟.. لف وارجع، صح؟!
- وطبعاً الجواب يبان من عنوانه.. مش هنضيع وقتنا!
- إحنا فى ثورة.. والوقت مش فى مصلحتنا!
- طيب والعقل والمنطق والأولويات.. هل تريد ثورة بلا عقل؟!
- من قال هذا؟.. لكن إنت اللى بارد حبتين بس!
- حاول تفتكر مقولة الشيخ الشعراوى عن الثائر الحق!
- فاكرها.. الثائر الحق يثور ليهدم الفساد.. ثم يهدأ ليبنى الأمجاد!
- عليك نور.. فين بقى الهدوء؟.. كل يوم اشتباكات وزحف!
- يكون فى علمك لولا استمرار الثورة، ماكنش حد دخل السجن!
- مهم أن تبقى الثورة قائمة، ومهم أن تبقى رشيدة.. متى تهدأ ومتى تزحف؟!
- جايز يكون فيه استعجال فى الزحف شوية لكنه مطلوب!
- فيه استعجال جداً.. خاصة البلد فى الداخل، تحتاج إلى مساندة وزحف داخلى!
- أنا محيرنى مين أطلق الرصاص على ماسبيرو؟.. إيه مصلحته؟!
- أيوه كده نتكلم.. من يطلق الرصاص؟.. ومن يحرق الأضرحة؟!
- مصر مستهدفة.. تنام على حريق أو حادث.. وأخيراً موقعة جمل جديدة!
- ينفع بقى فيه بلد مستهدف، يفتح جبهة أخرى.. رايح يحارب؟!
- صراحة لأ.. لكن كان لازم نزحف، ونحرر كل شبر!
- السؤال: متى نزحف؟.. ومتى نحافظ على جبهتنا الداخلية؟!
- أنا ملاحظ إن كل ما نقوم من جحر، نقع فى دحديرة!
- هنا بقى لازم نفوق.. بلدنا أولاً.. مصر أولاً!
- فلسطين برضه بلدنا.. وأمننا القومى!
- دورها جاى.. مش فلسطين وبس.. المهم تنتصر الثورة!
- حاسس إنك خايف.. هل ممكن مبارك يرجع؟!
- عمره ما هيرجع تانى.. بس جسم الأفعى موجود!
- طيب معناها إيه لف وارجع.. ومبارك كان أرحم؟!
- لو فقد الناس الإحساس بالأمن.. هيقولوا إيه.. مبارك أرحم!
- بس ده شىء معروف فى كل الثورات.. ومصر فين من الثورة الفرنسية؟!
- كان عندنا استبداد وسرقة واستقرار وأمن.. صح؟
- لأ كان عندنا سرقة واستبداد وقهر، بيسموه استقرار.. صح؟!
- الناس عاوزة تنام.. عاوزة أمن.. الأولوية الأولى قبل الأكل!
- يبقى لازم كلنا نلف ونرجع.. على بيوتنا ومصانعنا.. وجامعاتنا!
- كده مبارك عمره ما هيرجع.. يروح فى ألف (...)!
- غلطان أنا؟
- لألألألألألألألألأ!