انتخبوا «أبوعزة» رئيساً للجمهورية

أثناء خروجى من مبنى صحيفة «المصرى اليوم» استوقفنى رجل بسيط أمام الأسانسير، وسألنى: مش حضرتك صحفية فى «المصرى اليوم»؟
قلت له: نعم
قال: عايزك تعملى معايا حديث.
قلت: بمناسبة إيه ومين حضرتك؟
قال: أنا سأرشح نفسى لرئاسة الجمهورية.
قلت بعفوية: وانت مؤهلاتك إيه علشان تبقى رئيس؟
فأجاب بثقة: مصر تحتاج لأمثالى، واحد فاهم الشعب، عايش فى وسطهم، بيلبس زيهم، وبياكل زى معظمهم.. ساندويتش فول وطعمية، مصر مش محتاجة واحد من البهوات اللى بيتكلموا إنجليزى ويلبسوا بدلة وكرافتة جديدة فى كل مقابلة، ويهتمون بالظهور فى الصحافة والتليفزيون أكثر من اهتمامهم بأحوال الناس.
قلت: لم ترد على سؤالى إنت خريج إيه؟
فقال: دبلوم صنايع، ثم نظر لى بتحد وهو يكمل: لا يوجد شرط فى الدستور أن يكون رئيس الجمهورية من خريجى الجامعة الأمريكية، مش مهم الشهادة، فأنا مثقف جدا وأتابع الجرائد، ونشرات الأخبار، ومباريات كرة القدم، والتنس كمان، عندى ورشة حدادة بها عشرة صنايعية كلهم مؤمن عليهم، يعنى رجل أعمال شريف، أدفع الضرائب بانتظام، ومخلص للبلد، وعندى أفكار لتشجيع الاستثمار، بس للشرفاء وليس للسماسرة واللصوص، على فكرة أنا حاسس إنى مش مالى عين حضرتك، وإنك مش مقتنعة لا بشخصيتى ولا بفكرة ترشيحى، عايز أقولك حاجة يا أستاذة، وخديها منى حكمة: عبدالناصر مش هييجى زيه تانى، زمن الزعماء انتهى، إحنا عايزين رئيس من الشعب، وإذا كنتى روحتى ميدان التحرير أثناء الثورة، أكيد عرفتى إن كل اللى كانوا هناك «قطعيتى»..
يعنى شكلى كده، متعرفيش تفرقينا من بعض، نفس الحال ونفس الهم، والفروق فى القميص والبنطلون مش جامدة، المهم إننا زى ما بتقولوا علينا «الشارع المصرى».
نظرت له بجدية هذه المرة لأن كلامه بدأ يثير اهتمامى، وسألته: يعنى إيه عبدالناصر مش هيتكرر؟ فأجاب: يعنى مش هنلاقى زعيم ساحر عينه كلها قوة وتأثير، ومالى هدومه، ولما يخطب الشوارع تفضى والناس تتابع كل كلمة يقولها، أما حاليا.. إحنا فى زمن الغلابة، عايزين رئيس على قد حالنا، شبهنا ومتواضع معانا.
سألته: هل أنت عندك إمكانيات تخليك تقفل ورشتك وتتفرغ لانتخابات الرئاسة؟
قال: أقفلها ليه، الصبيان يشغلوها، وأنا أتابع من بعيد، أنا عامل «نظام»، وبعدين البلد أهم.
قلت له: وكيف ستحصل على 30 ألف توكيل لترشيحك وأنت بلا شعبية؟
قال: عشان كده جيت هنا، المهم الإعلام، كام حوار وبرنامج يعملولى شهرة، وبعدها كل شىء سهل، شوفتى حضرتك وائل غنيم شاب نحيف وغلبان كده، قبل الثورة لو قابلتيه فى الشارع، ممكن يصعب عليكى ويبقى نفسك تديله ساندويتش، حاليا كل الإعلام بيجرى وراه عشان يعملوا معاه أحاديث صحفية، حتى إسرائيل عملت معاه حوار صحفى، هتعملى معايا الحوار إمتى؟
طلبت منه أن يعطينى اسمه ورقم تليفونه، ووعدته بأن أتصل به فيما بعد، وصافحته باحترام وانصرفت، وفى طريق عودتى للمنزل انشغلت جدا بكلام الأخ ماهر، مرشح الرئاسة أو، بتعبير أدق، الذى ينوى الترشح للرئاسة، وسألت نفسى: لماذا صدمنى طموحه فى البداية، وتعاملت معه باستهزاء وكأنه مختل؟
هل لأنه شخص مجهول لم يفرض علينا نفسه فى وسائل الإعلام المختلفة، أم لأنه رجل بسيط الحال متواضع الهيئة، من أبناء «الطبقة المفرومة» التى عانت الويل طويلا، لماذا استكثرت على ماهر تطلعه للرئاسة وطموحه لحكم بلد يحبه ويرى أنه مؤهل لإدارته بنجاح وإخلاص كما فعل فى ورشته؟
وعند هذه النقطة تذكرت شخصية «أبوعزة» فى مسرحية «الملك هو الملك» للكاتب السورى الراحل سعدالله ونوس، فهذا الرجل النكرة الفاشل فى تجارته وحياته تحول إلى ملك ما بين ليلة وضحاها لأن الملك الأصلى الملول أراد أن يجعل من «أبوعزة» أضحوكة بين حاشيته، فوافق على توليه الحكم كتمثيلية مؤقتة متأكدا أن لا أحد غيره يستطيع أن يقنع الشعب ويدير دفة المملكة، لكن بمجرد ارتداء «أبوعزة» التاج وجلوسه على العرش، أحكم قبضته على صولجان الملك، وتقرب منه الجميع وأيده الأمراء والشيوخ وشهبندر التجار، وكان ونوس قد اختار لهذا الفصل فى مسرحيته عنوان «أعطنى تاجا أعطك ملكا»، ويبدو أن اليوم لم يختلف كثيرا عن الأمس إلا فى الوسيلة،
فقد أصبح الإعلام هو صانع الملوك والرؤساء، وأصبحت العبارة «اعمل معايا حوار عشان أبقى رئيس»، لأن الشهرة أصبحت هى المعيار وليس الكفاءة، فنحن لا نعرف فى هذا العالم إلا ما نراه ونسمعه، وما الباقى إلا كتلة مبهمة، وهذا هو سر الصراع المحموم على امتلاك وسائل الإعلام والجرى وراء الصحف والفضائيات، فنحن نشترى ما نعرفه من خلال الإعلانات، وكذلك نتعلم ونختار الرئيس، فلا تتعجبوا إن حكمنا «كيس شيبس» أو «سمن الهانم»، وأنا شخصيا أرى فى هذه الحالة أن «أبوعزة» أرحم بالبلاد!