هل هي ثورة سياسية فقط ؟!!

سؤال يطرح نفسه .. هل هذه الثورة سياسية فقط ؟
سؤال بيلح عليا مش لاقيله إجابة .. أما بسمع عن ما حققته الثورة كل يوم
خلع الرئيس السابق الفاسد و من ثم رموز نظامه تباعاَ
ثم البدء في التحقيقات و الحبس على زمة التحقيق و قريباَ محاكمتهم و تولي حكومة رئيسها من قلب الثوار في الميدان
و بدء الإصلاحات داخلياَ و خارجياَ .. و ..و .. وكل الكلام الحلو اللذيذ الجامد ده
بس في رأيي كل ده شغل سياسي و قانوني و قضائي و كل الكلام اللي الشعب نفسه مش مستفيد منه حاجة غير كلام أو الأخذ بالقصاص من النظام البائد ( .. اللي في رأيي لسة قدامه سيكة على ما يقع خالص )
لكن ما علينا من ده ..
أثناء الثورة .. كان الهتاف ( عيش , حرية , عدالة إجتماعية ) ده غير ( الشعب يريد إسقاط النظام) .. على الترتيب
يعني الثورة قايمة عشان إصلاح في الجانب الإقتصادي , السياسي و الإجتماعي
لكن اللي شايفه و اللي قلناه هو اللي ف النص بس
انما الإقتصادي .. كل اهتمامنا إزاي نرجع فلوسنا اللي برة ( اللي قدامها مش أقل من 3 سنين ) .. و ناسيين ازاي نظٌبط الجوة
لسة سعر كيلو الطماطم 3 و 4 و 5 جنيه و في إرتفاع متزايد
باقي السلع التانية معرفهاش منزلتش أشتري حاجات من فترة
!!و اسطوانات البوتجاز ( الأنبوبة ) ب 25 جنيه في أماكن و 20 ف أماكن أخرى و 35 ف أماكن أخرى .. تخيل
و بردوا مازالت تحلق ..
و غيره و غيره .. من احتياجات المواطن الغلبان .. اللي محسش غير انها صعبت عليه أكتر
أنا متيقن ان دي حاجة وقتية .. بس بسأل ليه متحطتش في أولويات الحكومة زي باقي الأولويات .. مظنش انها أقل من باقي الأولويات في حاجة .. بالعكس ده هو ده اللي عايزاه و محتاجاه اللأغلبية الكاسحة من الشعب ( على رأي صاحبنا ) ..
ده غير لسة طوابير العيش .. و المواصلات الخربانة اللي 75% منها غير اٌدمي بالمرة ..و .. و و من هنا لبكرة لو هنعد نعد
و أنا أتمنى بصراحة ان تطلع جمعة في التحرير .. اسمها جمعة الرغيف أو جمعة الحياة أو جمعة العيشة الصح .. الخ
يارب يارب .. يلتفت مجلس الوزراء لذلك .. و يحلها بدري و إلا فعلن هتقوم ثورة الجياع قريب.
إن شاء الله بكرة أكتب عن الجزء اللي مضايقني أنا شخصياََ و هو الإجتماعي و الأخلاقي.
EiNo..