ميدان مقفول

(ميدان مقفول )
مهداة: إلي روح د. نصر حامد أبو زيد
افتح مداخلك للملايكة و العساكر و السنجْ
انت الميدان اللي انصهر فيه اختلاف الزائرين
ولا عمره فتش حد و لا فض اعتصام
يا قلب صام
و الكون بيفطر ع الخضوع
عصافير كنارية معدتك
بتعلم الجوع الركوع
دايماً تطبطب ع المناضل و العميل و البلطجي
بالحلم بتهدي الزهور و انت اللي قلبك ثورجي.
العادي و المطلق صحاب
و الكفر بالنوتة / العمَالة للغُنا
هي السما بخلانة ليه بالمعجزات الممكنة؟
افتح مداخلك للي صانك و اللي خانك
و اللي خاف ينطق ف بصْ
دخل ولاد الشحاتين و الأغنيا و النُّص نُص
مين اللي قال ان الرصاص يقدر يسكّت صوت ميدان
آمن بإن الشعر أصدق م القصايد
و ان اقتراف الحب – رغم القصف- نَصْ
**********************************
يا ابو صدر مكشوف للحياة و الموت
و خوف الطيبين
ع الباقي في جيوب المحن و الجي و هموم العيال
دمك بيدبح في السيوف
و يعلم الدنيا الخنوع للكافرين
بالضلمة و الشمس ال خشب
يا أيها الرجل/ الميدان اللي انفجر من ضعفنا
اقفل مداخلك ع الملايكة و القصايد و الغنا
و ارفض تدخل حد فينا يحتفل بالنور معاك
انت المظاهرة اللي اتملت شهدا و نضال
و احنا العساكر و السيوف و البلطجية و السنجْ