بالفيديو.. «حكايات صيادين خرجوا علشان لقمة العيش ومرجعوش تاني»

«خرجوا ومرجعوش تاني، عايزين بس نطمن عليهم»، كلمات اتفقت عليها أسر الصيادين المصريين، والذين اختفوا فور وصولهم إلى شواطئ ليبيا للبحث عن لقمة عيش كريمة لأسرهم.
«المصري اليوم» التقت عائلات بعض الصيادين، والذين أكدوا أنهم ليس لديهم أي مطالب سوى: «نشوف ولادنا ونطمن عليهم».
البداية مع من كفر الشيخ، زوجة أحد الصيادين الغارقين على سواحل ليبيا، أحلام إبراهيم، والتى قالت: «زوجي كان يذهب كثيراً إلى ليبيا ولكن حين قامت الثورة لم يذهب كثيراً، مؤخراً اقترح عليه عدد من الصيادين الذهاب إلى ليبيا ووافق، وبعدها انقطعت أخباره، تأتي الاتصالات لينا تفيد بأنه محبوس وبعدين عرفنا إنه من الناس اللي غرقت».
تتابع حديثها باكية: «مش عايزة أي حاجة غير حق عيالي وجوزي اللي اتظلم، ناس كتيرة هنا اتظلمت بسبب البحر، والله حرام اللي بيحصل ده، اللي بيروحوا البحر ميجوش ومحدش يعرف عنهم حاجة تانية».
والد أحد الصيادين قال في حديثه: «الصيادين هنا بيعانوا كتير، قلة في الشغل ومفيش دخل، ودخلهم يوم بيوم، الحالة بقت صعبة ولا إيراد ولا أي حاجة».
من قرية آخري من قري كفر الشيخ، قالت زوجة أحد الصيادين المفقودين على سواحل ليبيا: «راح يدور على أكل عيش، ومن ساعتها كل شوية يقولوا مش لاقيينه، شوية ده المافيا خطفتهم، وشوية فجر ليبيا»، وتتابع باكية: «مش عارفة أعيش من غيره، بنترجي رجعته لينا أنا معايا أربع عيال، مش عايزة أي حاجة من الدنيا غير إنه يرجع»، والدته اكتفت بالقول: «أنا مش عايزة غير إنه يكلمني ويقولي أنا في الحتة دي وبس».
خضرة، زوجة أحد الصيادين، بدأت حديثها للكاميرا وقالت: «والله راح ومعرفش عنه أي حاجة، ولما بتصل باللي كانوا معاه بيقولوا مش عارفين حاجة.. ده كان عايز بس اللقمة الحلال طلع ومجاش».