فيديو.. خالد الجندي عن «قاهر جن فتيات الغربية» مع ريهام سعيد: «نصاب»

قال الشيخ خالد الجندي إن «الجن عالم موجود مفيش فيه شك»، الخميس، معتبرًا أن «النصاب أو الدجال شخصية لازم يكون بيلعب ب3 بيضات ومش ببيضتين وحجر، وراجل عارف يدخل لك منين فبيتلاعب بالألفاظ».
وأضاف الجندي، في حلقة برنامجه «نسمات الروح» على قناة «الحياة»: «هو نصاب وممكن ييجي لك أقرع وعضو مجلس شعب سابق وهو نصاب»، مستكملًا بقوله: «عضو مجلس شعب سابق وكل حاجة إنما عضو مجلس شعب سابق عن الحزب الوطني الفاسد»، في إشارة إلى علاء حسانين، بطل حلقة «مس الجن للإنسان»، التي قدمتها ريهام سعيد على قناة «النهار» في برنامجها «صبايا الخير»، مساء الاثنين الماضي، بعدما أخرج الجن من جسد ال5 فتيات، بحسب ما روجت له الحلقة.
وتساءل: «هل الحزب الوطني هيطلع لك ولي من أولياء الله الصالحين؟ لا هيطلع لك نصابين، فطبعًا كل بيت بيتحرق وزيت بيدلق في الحمام فبيلبسها للجن ووراه جوقة منتفعين».
وقال: «يقولك أنت بتنكر الجن ده الجن مذكور في القرآن ويكشر بحواجبه، وأنت بتنكر السحر ده السحر مذكور في القرآن، وكل النصابين كده».
وأضاف: «فطبعًا كل بيت بيتحرق وراه جن، كل زيت بيتدلق في الحمام بيلبسك جن، ووراه جوئه منتفعين، ده طفى الحرائق، ده حبل النسوان، ده خلف العيال، ده كتر الأموال، وهو يروح داخل بحتة اكتساح، حالة من حالات القرع الاسطنبولي، ويجي يقول للناس: الحنفيات بتنزل نار والخرطوم بيطلع نار، ويجي يقولك: ده المطافي، والمطافي لما جت عملت كذا، والسؤال كالآتي: هي وزارة الداخلية بتقسم معاه؟».
يشار إلى أن علاء حسانين، كان عضوًا بالحزب الوطني المنحل، ونائبًا عن دائرة دير مواس بالمنيا وأمين سر لجنة الشؤون الدينية بمجلس الشعب سابقًا في 2005.
اشترك الآن لتصلك أهم الأخبار لحظة بلحظة