بالفيديو.. السيسي يعزي الشعب في شهداء سيناء: المعركة ممتدة وتتطور (نص كامل)

وجّه الرئيس الرئيس عبدالفتاح السيسي كلمة إلى الأمة، ظهر السبت، في ضوء تداعيات الهجمات الإرهابية على كميني كرم القواديس بالشيخ زويد والعريش، التي أسفرت عن استشهاد 30 ضابطًا ومجندا بالقوات المسلحة وإصابة 29 آخرين.
وقال السيسي، بعد انتهائه من اجتماع المجلس الأعلى للقوات المسلحة: إن المعركة مع التنظيمات الإرهابية ممتدة في سيناء «مش هتخلص في أسبوع ولا شهر ولا اتنين»، مؤكدًا إن «محدش هيقدر يكسر إرادة المصريين والجيش».
وأضاف: «مهم أوي نبقى عارفين الهدف المقصودة بيه العملية اللى اتعملت، العملية ورا منها دعم خارجي، تم تقديمه لتنفيذ العملية ضد جيش مصر بالشكل اللى شوفناه.. الكلام ده بيتعمل عشان يكسر إرادة مصر والمصريين، عشان يكسر إرادة الجيش باعتباره العمود، عمود مصر.. انتبهوا لما يحاك لنا، كل ما يحصل عارفينه وقولنا عليه من قبل 3 يوليو».
وتابع: «اوعوا تتصوروا إن وقوع ولاد مصر مايوجعناش، ولاد مصر سقطوا عشان تفضل مصر، فيه شهداء سقطوا وفيه شهداء هيسقطوا لأن دي قضية وحرب كبيرة، مصر تخوض حرب وجود، ما معناه إن إحنا يا مصريين على قلب رجل واحد ما نتلخبطش، نزعل آه ونتأثر لكن نبقى عارفين أبعاد المؤامرة الكبيرة».
وقال: «أنا مبقلقش إلا من حاجة واحدة، خوفي عليكم يا مصريين، طول ما المصريين واقفين ومنتبهين ومش ناسيين إن الهدف كان إسقاط الدولة ومش هتسقط بفضل الله، كل التحديات الموجودة تهون طالما الشعب المصري منتبه وصامد مع جيشه وشرطته كدة (يقبض بيديه)».
وقال: «إحنا ثابتين ومتحركين نحو هدف واحد هو إعادة الدولة المصرية لمكانتها ويزيد (كررها مرتين)، فيه ألم ودم كلنا هندفعه عشان خاطر بلدنا دلوقت والأجيال القادمة»، مشيرًا إلى أن «محصلة العمل خلال الشهور الماضية ضخمة جدًا حتى في مكافحة الإرهابيين، فيه إرهاب بيتم قتاله بقاله شهور، المئات من الإرهابيين تم تصفيتهم، سيناء كانت هتبقى كتلة إرهاب وتطرف».
ولفت إلى أن «المعركة في سيناء ممتدة مش هتخلص في أسبوع ولا شهر ولا اتنين، محدش هيقدر يكسر إرادة المصريين والجيش ولا يخش بين الشعب المصري وبين قيادته، ده الخطر الحقيقي».
وأشار إلى الإجراءات التي اتخذها ومجلس الدفاع الوطني منذ الجمعة إلى اليوم، قائلا إن «انهاردة وإمبارح خدنا إجراءات، والإجراءات اللي خدناها النهاردة هتبقى في إطار التطور اللي حصل يجابهه تطور من عندنا، والمنطقة الفاصلة بينا وبين القطاع، لازم ننهي جدورها، فيه إجراءات هتتاخذ كتير، وبقول للمصريين اطمنوا وخلي عندكم أمل دايمًا».
واختتم كلمته بتوجيه العزاء في شهداء هجمات كميني الشيخ زويد والعريش: «البقاء لله سبحانه وتعالى، العزاء مش لأهالي الشهداء، العزاء لنا كلنا، ستبقى إن شاء الله مصر، إوعوا، تحيا مصر تحيا مصر تحيا مصر»
كانت سلسلة تفجيرات متتابعة تمت خلال 10 دقائق، الجمعة، استهدفت كمينًا للجيش بمنطقة كرم القواديس، جنوب غرب مدينة الشيخ زويد، ومدرعتين للقوات المسلحة، وسيارات الإسعاف، التي هرعت لإنقاذ المصابين، وكميناً آخر بالعريش، أسفرت عن استشهاد 30 ضابطًا وجنديًا بالقوات المسلحة، وإصابة 29 آخرين.
اشترك الآن لتصلك أهم الأخبار لحظة بلحظة