السيسي: «اطمنوا.. والدولة مش هتسقط» (فيديو)

قال الرئيس عبدالفتاح السيسي إن المعركة مع التنظيمات الإرهابية ممتدة في سيناء «مش هتخلص في أسبوع ولا شهر ولا اتنين»، مؤكدًا أن «محدش هيقدر يكسر إرادة المصريين والجيش».
وأضاف السيسي، خلال كلمة وجهها للأمة ظهر السبت، في تعليقه على هجمات الشيخ زويد والعريش الإرهابية: «اوعوا تتصوروا أن وقوع ولاد مصر مايوجعناش، ولاد مصر سقطوا عشان تفضل مصر، فيه شهداء سقطوا وفيه شهداء هيسقطوا لأن دي قضية وحرب كبيرة، مصر تخوض حرب وجود، ما معناه إن إحنا يا مصريين على قلب رجل واحد ما نتلخبطش، نزعل آه ونتأثر لكن نبقى عارفين أبعاد المؤامرة الكبيرة».
وتابع: «أنا مبقلقش إلا من حاجة واحدة، خوفي عليكم يا مصريين، طول ما المصريين واقفين ومنتبهين ومش ناسيين إن الهدف كان إسقاط الدولة ومش هتسقط بفضل الله، كل التحديات الموجودة تهون طالما الشعب المصري منتبه وصامد مع جيشه وشرطته كده (يقبض بيديه)».
وقال: «إحنا ثابتين ومتحركين نحو هدف واحد هو إعادة الدولة المصرية لمكانتها ويزيد (كررها مرتين)، فيه ألم ودم كلنا هندفعه عشان خاطر بلدنا دلوقت والأجيال القادمة»، مُشيرًا إلى أن «محصلة العمل خلال الشهور الماضية ضخمة جدًا حتى في مكافحة الإرهابيين، فيه إرهاب بيتم قتاله بقاله شهور، المئات من الإرهابيين تم تصفيتهم، سيناء كانت هتبقى كتلة إرهاب وتطرف».
ولفت أن «المعركة في سيناء ممتدة مش هتخلص في أسبوع ولا شهر ولا اتنين، محدش هيقدر يكسر إرادة المصريين والجيش ولا يخش بين الشعب المصري وبين قيادته، ده الخطر الحقيقي».
وأشار إلى الإجراءات التي اتخذها ومجلس الدفاع الوطني منذ الجمعة إلى اليوم، قائلا إن «المنطقة الفاصلة بينا وبين القطاع، لازم ننهي جذورها، فيه إجراءات هتتخذ كتير، وبقول للمصريين اطمنوا وخلي عندكم أمل دايمًا».
واختتم كلمته بتوجيه العزاء في شهداء هجمات كميني الشيخ زويد والعريش: «البقاء لله سبحانه وتعالى، العزاء مش لأهالي الشهداء، العزاء لنا كلنا، ستبقى إن شاء الله مصر، اوعوا، تحيا مصر تحيا مصر تحيا مصر»
كانت سلسلة تفجيرات متتابعة تمت خلال 10 دقائق، الجمعة، استهدفت كمينًا للجيش بمنطقة كرم القواديس، جنوب غرب مدينة الشيخ زويد، ومدرعتين للقوات المسلحة، وسيارات الإسعاف، التي هرعت لإنقاذ المصابين، وكمينا آخر بالعريش، أسفرت عن اسشهاد 30 ضابطًا وجنديًا بالقوات المسلحة، وإصابة 29 آخرين.
اشترك الآن لتصلك أهم الأخبار لحظة بلحظة