المصريون على أرصفة المدينة يطاردون الرزق ويطاردهم الموت

يتجمع المصريون فى بنغازى على أرصفة الميادين ووسط جزرها، يعرفهم جميع سكان بنغازى، كما يفترشون أرصفة الميادين فى مصر انتظارًا لرزق عابر.. انتقلوا بعادتهم إلى شوارع بنغازى، فمن يريد عمالة مصرية سيجدهم جميعًا على هذه الأرصفة بالميادين الكبرى بالمدينة فى تجمعات ضخمة، ما إن تقف إحدى السيارات حتى يتجمع عليها العمال المصريون، آملين أن القادم آت برزق يوم جديد، فى مدينة لم يعد أهلها آمنين على أرواحهم، وتسيطر عليها مجموعات يظن معظمهم أن المصريين جواسيس بعثت بهم المخابرات وأمن الدولة فى مصر لهدم النظام فى ليبيا.. هذه هى الشائعة الأوسع انتشارًا فى مدن ليبيا اليوم، أن المخابرات المصرية بعثت بجواسيس إلى ليبيا لمطاردة الإخوان الفارين إليها، وبات المصريون بين الخطر المعتاد الذى يعيشون فيه منذ سنوات، وهو استضعاف أهل البلد لهم بسبب ضعف السفارة المصرية هناك، (أو عدم وجودها من الأساس مؤخرًا)، وبين خطر الجماعات المتشددة التى أصبح مجرد ذكر اسم مصر أمامها كفيلا بإيقاظ كل اللعنات.
على أحد هذه الأرصفة يقف شاهر مصطفى جمعة (23 سنة)، سباك، من المنيا: «أنا فى بنغازى من 3 سنوات، والوضع هنا أصبح سيئا للغاية، الناس بتتعامل معانا هنا بطريقة سيئة جدا، من شوية كنا قاعدين فى وسط الجزيرة ناس جريت ورانا علشان تمشينا وهم بيضربوا بالعصيان وبيقولولنا روحوا على بلادكم، ودى أقل حاجة ممكن تحصل لنا، غير اللى بياخدونا على إننا رايحين شغل ويسرقوا فى الطريق موبايلاتنا وفلوسنا ويرمونا».
وهنا يتدخل محمود مضيوى (22 سنة)، سباك، من سمالوط المنيا، قائلاً: «من كم يوم اتخطف ابن عمى رفعت عاشور، عامل، واحد قاله تعالى شغل، وآخر اليوم اتصل بينا وقال لو عاوزينه هاتوا 2000 دينار، كلمنا الجيش رجعه لنا من غير ما ندفع فلوس».
ويقول أحمد محمد شحاتة (23 سنة)، عامل، من أسيوط: «بقى طبيعى إننا نلاقى ناس تجرى ورانا بالسلاح وفينا ناس مصابة، لكن هنعمل إيه أكل العيش مر».
بصوت عال ونبرة غاضبة تصحبها تلويحة قوية من يده يتساءل محمد راضى عبدالمنعم (24 سنة)، سباك، من المنيا: «هنروح مصر نشتغل إيه؟ أيوه باسمع وأشوف التفجيرات هنا، لكن هنعمل إيه فى مصر وهناكل إيه؟ طوب؟، مش عاوزين الحرب تقوم هنا، لكن مش هنمشى غير لما يقولولنا نمشى، معظم المسيحيين مشيوا بعد اللى جرالهم لما اندبح الستة بتوع السلمانى».
فى جزيرة الجراد بحى السلمانى ببنغازى ترتفع أعلام أنصار الشريعة فى كل مكان، إنه الحى الذى كان يقطنه المصريون الستة الذين اختطفتهم جماعة أنصار الشريعة وأخذتهم لتقتلهم على مدخل قرية الجروثة.
ورغم ما حدث للمصريين المسيحيين مازال رامى أمين مينا (23 سنة)، عامل، من أسيوط، يصر على البقاء فى بنغازى، وبصوت هادئ ونظرة منكسرة تملؤها قلة الحيلة يقول رامى: «بعد قتل زملائنا قعدنا فى الحوش محبوسين 15 يوم لا نطلع ولا ندخل، ولسه لحد دلوقتى مرعوبين، المسيحى عند الجماعات دى كافر وبيكرهونا، لكن إحنا عايشين هنا بستر ربنا هنعمل إيه؟ مرة اشتغلت مع واحد وفى آخر اليوم بعد ما خلصت وهاخد أجرتى قاللى اسمك إيه؟ ولما قلتله سحب عليا الكلاشة (كلاشينكوف) وقاللى عدى مالكش حاجة هنا».
ليس كل من أتى إلى بنغازى جاء بشكل رسمى، ولكن عددا ليس بالقليل أتى مُهربا بطريقة غير شرعية، ومنهم علاء محمد على (25 سنة)، مبيض محارة من أسيوط، الذى يقول: «أنا جئت هنا عن طريق سواق بيشتغل مع بدو فى مرسى مطروح، هربونى من هناك بالعربية لحد نقطة معينة، وبعدها أخدت مركب عدتنا الحدود».
عن السبب وراء سعيه للدخول غير الشرعى فى ظل توافر تأشيرات العمل بليبيا يقول علاء: «التأشيرة ب7000 جنيه، وصعب أخدها، لكن أنا جئت ب3000 جنيه، اللى قدرت أوفرهم».
أحدث من دخلوا إلى بنغازى، مهربا، كان سامح سيد نسيم (27 سنة)، عامل، من أسيوط، والذى قدم إلى المدينة قبل أسبوعين اثنين يقول سامح: «بعد ماجيت تهريب رمونا فى سوق العتيبة، واتصلنا بالناس اللى لينا هنا جت أخدتنا، عرفت قيمة بلدى أول ما عديت الحدود وحسيت بالغربة، بس أعمل إيه مافيش شغل فى بلدنا؟».
لم يعد ما يقابل المصريين المستهدفين فى بنغازى خطر الخطف أو القتل من الجماعات المتطرفة فقط، بل أصبح الكثيرون يمارسون ضدهم طقوس البلطجة، يقول محمود محسن (19 سنة)، عامل، من أسيوط: «نظل نكسر حجر ونشيل رمل طول اليوم، وفى الآخر ياكلوا علينا فلوسنا، وأنا مروح الأسبوع اللى فات طلعوا عليا ناس بالسنج ضربونى ضربة مليحة، وأخدوا 40 دينار أجرة اليوم والتليفون، أنا عاوز أروح ومش عارف أروح إزاى، عاوزين القوات المسلحة بتاعتنا تبعت أتوبيسات تاخدنا».
وهنا يتدخل أحد المصريين، الذى يعمل رئيسا للعمال ينظمهم ويوزعهم على طالبى العمل، قائلا: «ليبيا مابتضربش أحد على إيده علشان ييجى، ومابتجيبش أحد من بيته، ولو كان فيه شغل فى مصر ماكنتوش جيتم هنا».