معتز عبدالفتاح: «6 أبريل» هتعارض أي رئيس حتى لو نبي.. وإحنا مش عايزين فوضى

علق الدكتور معتز بالله عبدالفتاح، على الحكم الصادر من محكمة القاهرة للأمور المستعجلة، بحظر نشاط حركة 6 أبريل ومصادرة مقراتها بقوله: «حركة 6 أبريل اختارات إنها تكون على شمال أي سلطة».
وأضاف «عبدالفتاح» في حلقة برنامج «باختصار»، الثلاثاء، على «المحور»: «6 أبريل تبنت موقف إنها تكون دائما على شمال السلطة، وهتعارض أي سلطة توصل للحكم، ولو جالهم نبي هيعارضوه».
وطالب معتز عبد الفتاح الحركة بعمل حزب سياسي، قائلا: «اعملوا حزب وخدوا خطوة لقدام وادخلوا تحت مظلة الدولة علشان محدش يقولكم إنكم خونة وعملاء».
كما طالب المرشحين لخوض الانتخابات الرئاسية ب«عدم ارتكاب أخطاء تجعل التعاون بينهم مستحيلًا الفترة المقبلة».
وشدد على ضرورة التحام المشير السيسي الممثل لبقايا الدولة، مع المرشح حمدين صباحي، الممثل لبقايا الثورة، لتحقيق أهداف ثورة 25 يناير، مضيفًا: «إحنا عايزين التزام بالقيم والأخلاقيات، عايزين بقايا الثورة تلتحم مع بقايا الدولة، لا عايزين ثورة تانية ولا فوضى، عايزين نحقق أهداف ثورة 25 يناير ولازم توصل للدولة وتبقى ع أجندة متخدي القرار في الدولة».