نظرية التآمر.. أنظر حولك!

إنتبهوا أيها السادة!
أنظر حولك!
يا جماعة انتوا مش فاهمين..
خليكوا مفتحين كدة وشغلوا مخكوا!
الموضوع محتاج شوية تركيز..
بس أول ما تقرا اللي أنا قدرت أتوصله بالتحليل والقياس والاستنباط والاستنخاع..
هاتفهم المخطط اللي بيستهدفني أنا وإنت.. مش إحنا المشكلة.. ولا الحكومة.
دي الأصابع الخفية.. وأحياناً كثيرة، الأيدي الخفية..
(شكلهم بيلبسوا جوانتيات الإخفاء)
الموسااااد.. أبناء صهيوووون.. امريييكا.. الغرب الكافر.. أجندةالغرب.. هم دول اللي ورا كل المصايب..
مين اللي ورا تفجيرات كنيسة القديسين؟ اليهود اللي كانوا بيحتفلوا بمولد أبو حصيرة.
مين اللي سلط أمين شرطة مهلوساتي ممنوع من حمل السلاح وإداله سلاح
وقاله روح إضرب نار عشوائي بس ركز على النصارى؟
مش الصهاينة الاعداء اللي عايزين يقطعوا نسيج الوطن؟
مين اللي ملوث مية النيل وبيرمي فيها الكيماويات والحيوانات النافقة؟
الموساد طبعا، موصل أنبوبتين "من الكنيسيت ذااااااته" إلى منابع نهر النيل..
واحدة بتضخ كيماويات وحيوانات نافقة والتانية بتضخ عسل وطحينة!
مين اللي سلط القروش على السياح الروس؟
اليهود ركبوا شريحة ذكية في عقول القروش، وبرمجوها عشان تضرب السياحة في مصر..
وركبوا شرايح تانية في أجنحة النسور وبعتوها السعودية تتجسس عليهم..
وهناك مخطط صهيوني لتركيب شرائح متناهية الصغر في عقول الذباب والناموس والصراصير..
اصحوووا.. الموساد قرر ينتشر ويتوغل ويتسمر ويستمر!!
"من أطلق الرصاص على هند عزام"؟
اليهود أكيد "اتفقعوا" من وطنية نادية الجندي وأطلقوا عليها الرصاص بالتلاتة!
أضف إلى ذلك تاريخ نادية الجندي الحافل بالبطولات
من أيام "مهمة في تل أبيب" و"48 ساعة في إسرائيل"
ده مخطط يهودي يا ابني مش لعب عيال!
قاعدين متابعين مسلسلات رمضان وأفلام الموسم وعارفين كل كلمة بتتقال..
إحنا دولة مستهدفة ونطالب بتشفير النايل سات، على الأقل بعد المدفع في رمضان!
من المسئول عن هزيمة مصر أمام الجزائر في مباراة أم درمان التاريخية؟؟
أنا هارد على السؤال الملتوي ده بسؤال ملتوي أكتر منه:
ومن المستفيد من الوقيعة بين الأخوة العرب؟
إنت فاكر العيال اللي علمت الفيديوهات المليانة شتايم موجهة للمصريين وللجزائريين دول عرب؟
انت مخطيء.. دول إسرائيليين!
أخدت باللك إن السنجة اللي كانت في إيد الواد مقاس 93سم؟
دي نفس السنجة اللي بيستخدمها جيش الاحتلال الاسرائيلي! وعندي الأدلة القاطعة الدامغة!
مين اللي حرق مكتبة الإسكندرية من ييجي عشرين قرن؟
ثبت بالأدلة وبالبحث والتنقيب في كتب التاريخ إن حريق الإسكندرية جاء بعد مولد أبو حصيرة "برضه" بيومين تلاته!!
يا أخي اليهود دول كل ما ينزلوا مصر عشان يحتفلوا بمولد أبو حصيرة يعملولهم مصيبة في إسكندرية!
تقدروا تقولولي مين اللي صدرلنا المبيدات المسرطنة؟؟
أبناء العم سام طبعاً!
طب وأكياس الدم الفاسدة؟؟
ولاد أخت العم سام.. دي عيلة زبالة يا راااجل!
مين اللي سرق العمود؟
الغرب الكافرعايز يطفيء النور ويرجعنا لعصور الظلمات!
مين اللي ميحبش فاطمة؟
في أوروبا والدول المتقدمة مبيحبوش فاطمة!
طب مين اللي جوه في قلبي؟
طب مين حبيب بابا؟
ومين عذبك بتخلصه مني؟؟
مش اليهود والغرب الكافر وأمريكا والأجندة والصهاينة والعملاء؟
أنظر حولك!