رحلة «أسرة مسلمة» لكنائس شبرا لتهنئة جيرانها المسيحيين

وسط إجراءات أمنية مشددة أمام كنيسة مار جرجس «الجيوشى»، ظهر رجل مسن وزوجته المحجبة بخطوات بطيئة، اقتربا وحاولا الدخول كبقية القادمين، وبمجرد عبورهما البوابات الإلكترونية بدآ يمران بين الحضور، راسمين على وجهيهما ابتسامة بسيطة، رافعين يديهما ورأسيهما للجميع ومرددين بحماس وحب: «كل سنة وأنتم طيبين»، قبل أن تنتهى مسيرتهما داخل الكنيسة، بإشعال شمعة أمام صورة للسيدة مريم العذراء.
«جئنا نعيّد على جيراننا ونحضر معهم القداس».. ببساطة رجل مصرى مسن، قالها «محمد الحسينى» ل«المصرى اليوم» ونظر إلى زوجته شادية خطاب مبتسماً.
لم يكترثا لبرودة الجو وكبر سنهما، ولكنهما حرصاً على الحضور لتهنئة جيرانهما فعلى حد قولهما كل جيرانهما أقباط، وهما الأسرة المسلمة الوحيدة بالبيت، حيث قال الزوج السبعينى: «مالناش بركة غير جيرانا، بقالنا أكتر من 30 سنة مع بعض لم نر منهم إلا كل خير، فطبيعى إننا نيجى نشاركهم العيد السنة دى تحديداً عشان نكون جنبهم، ولو حصل حاجة يعرفوا إننا معاهم.. يا نعيش سوا يا نموت سوا». تلتقط شادية خيط الحديث من زوجها وتقول: «إحنا لسه جايين من كنيسة العذراء عشان مش كل جيرانا بييجوا الجيوشى، عدينا عليهم برده عشان ماحدش يزعل». وبسؤالها عما إذا كان مرورهما على الكنائس يحدث كل عام أم أنها استثنائية، قالت: «كنا زمان بنروح القداس كل عيد، لكن مع كبر السن مابقيناش نروح كتير، لكن السنة دى كان لازم عشان يعرفوا إن لو حصل حاجة هنكون معاهم، وعشان اللى قاصد يعمل كده فيهم يعرف إننا مسلمين ومسيحيين مع بعض، شبرا دايماً كده، بنصحى على جرس الكنيسة ونعمل الكعك مع بعض.. عمرنا ما سمعنا عن مسلمين ومسيحيين هنا، كلنا جيران وإخوات».