انتخبونى.. انتخبونى

انتخبونى.. انتخبونى.. أنا حبيبكم.. أنا قريبكم.. علشان خاطرى انتخبونى.. معاكم دايماً تلاقونى.. فى الأحزان وفى الأفراح.. أنا موش محتاج يا حبايب تدعونى.. يا ريت بقى أصواتكم تدونى.. ها أعمل لكم أنفاق وكبارى.. وألاعبكم «جولف» و«فيفا» و«أتارى».. وفى تنفيذ طلباتكم.. أنا هابقى نائب «انتحارى»!.. أ
بوس إيديكم انتخبونى.. ها وظف ولادكم.. وهاجوز بناتكم.. وهاأعوض اللى فاتكم.. بس إنتوا للحصانة مسكونى.. انتخبونى.. انتخبونى.. أنا ابن الدايرة انتخبوانى.. أنا بلعب بس «بوكر» موش بلعب «قمار».. موش بنقط «بالجنيه» لأ بنقط «بالدولار».. والعبّارة بتاعتى واقفة ليكم انتظار.. وهروبى من «التجنيد».. ده «تكتيك» حربى موش «فرار»!..
يا حبايب.. يللا انتخبونى.. بطلت أبيع «أكياس الدم».. مقدرش أنا على شيل الهمّ.. بس «عقودى» برضه هتم.. انتخبونى.. انتخبونى.. هابنى «منتجعات» و«مساكن».. فى أحلى «ربوات» و«أماكن».. وشقق فى «الفيس بوك» لكل مواطن.. ومناطق «باركنج» فاضية.. تروح فيها راكن!..
انتخبونى.. أنا خدامكم.. ده أنا رشحت نفسى عشانكم.. دى «موبيلاتى» ودى «إيميلاتى».. «ميسد كول» تلاقونى قدامكم.. متشكر متشكر يا حبايب.. أنا فزت وبقيت «النايب».. و«الحصانة» اللى أنا فيها دايب.. هاتخلى النايب فى السايب!.. لو عُزتونى فى «الفيلا» تلقونى.. أو عالموبايل كلمونى.. إنتو بس تأمرونى.. وأنا أديلكم نور عيونى.
رسالة صوتية:
عزيزى الناخب آسف عزيزى المتصل.. هذا الرقم غير موجود بالخدمة.. لا تتأكد من الرقم المطلوب.. ولا تُعِد المحاولة.. تيت.. تيت.. تيت!
سوهاج- شارع الجرجاوية الشرقى