مرشحاً لرئاسة الجمهورية «1»

ماترشحش نفسك .. قالتها زوجتى وأنا مرهق .. وأكلة الحمام البلدى بالفريك كبست على نفسى ليه يا ست ما البلد فيها قانون والدستور قال إن أى واحد يرشح نفسه ثم انك هتبقى سيدة مصر الأولى.. ما انت عارف ان القانون لا ينطبق عليك.. لا أنت عضو فى مجلس شعب ولا منتمى لحزب ولا يحزنون.. لا يا هانم القانون اتغير هو انتى ما تعرفيش دلوقتى المادة ما عرفش كام اتغيرت تانى وخلت الواحد المستقل ممكن يرشح نفسه بدون قيد أو شرط طالما هو مصرى وابن مصرى.
انت نرفزتنى وهاجيبهالك على بلاطة انت قبطى.. يا سلام وهى دى شتيمة.. ما انا عارف انى قبطى وهاترشح واللى يحصل يحصل..
تفتكر الكنيسة هتوافق .. يا هانم الكنيسة بالنسبة لى للصلاة وبس ..
طيب ما هما أيدوا الريس وأيدوا جمال.. طيب وماله وممكن يؤيدونى.
طيب والإخوان.. والله أهو ده الكلام.. الكنيسة وممكن تأيد والإخوان ضرورى يأيدونى بس لو لغوا حكاية تولى المرأة وتولى القبطى ثم لو حصل ورفضوا هما نسبتهم مش كتير يعنى مش هيبقوا مؤثرين يعنى ينجحوا حد إو يسقطوه ثم إن الدنيا بايظة عندهم دول قابضين على ناس كتير منهم.
طيب وانت إزاى بتحب الريس وعاوز تنزل قصاده!
طيب ما الدستور اللى اتعدل بيقول كده ثم إن السياسة مافيهاش حب ولا كره، السياسة سياسة.
وعلى كده انت عملت برنامج انتخابى.. هو انتى نطيتى على طول كده للبرنامج الانتخابى من غير ما تسألينى على اللى قالب الشارع اليومين دول.. قصدك البرادعى.. دا راجل طيب ومحترم والناس ملفوفين حواليه بس عنده 67 سنة والبلد عاوزه شباب وأنا عندى أربعة وأربعين سنة وقبطى وصعيدى ولو فزت هاظبط الصعيد اللى نسيوه وماشى بيزك.
طيب ما هيطلعلك أيمن نور.. لا يا ماما.. أيمن ما يعرفش يترشح لأنه كان عنده قضية تزوير وكان مسجون، انسى قصة إنه يترشح واللى بيتقال فى الجرايد أهو كلام جرايد زى ما كان بيتقال زمان.
وعلى فكرة حكاية إنى عاوز أترشح دى أنا واخدها من أوباما هوه فيه حد كان يتصور إن زنجى ممكن يمسك رياسة أمريكا.. طبعا لا.. أهو حصل والدنيا بتتغير والناس بتتغير والنفوس بتتغير برضه.
والله أنا خايفة عليك.. ماتقوليش الكلام ده تانى.. البلد فيها حرية وفيها قانون – لمحت زوجتى تبتسم ابتسامة سخرية وهى تمصمص بشفتيها على طريقة أفلام الأبيض والأسود وعملت نفسى مش واخد بالى.
ولكنها قالت فجأة: قانون.. طيب وحياتك هات اتنين كيلو قانون وانت جاى دا قانون ساكسونيا لما وزير التعليم قال هرجع الضرب فى المدارس أول ما ركب الكرسى والعيال بقت ملطشة والقانون بيمنع الضرب، هو فين القانون.. باقولك إيه فضيها سيرة وخلينا نفكر فى البرنامج الانتخابى.
يا ستى قبل البرنامج الانتخابى عاوز أعمل الشعارات اللى الناس هيكتبوها على اليفط واللى الهتيفة كل ما يشوفونى فى مؤتمر انتخابى يقعدوا يهتفوا لى بيها.. وطق فى دماغى دلوقتى واحد منها «شارل فؤاد يا إنسان.. إحنا وراك فى كل مكان».
«شارل فؤاد يا أبهة.. مصر هتبقى منجهة»