على اسم مصر التاريخ يقدر يقول ما شاء أنا مصر عندى أحب وأجمل الأشياء بحبها وهى مالكة الأرض شرق وغرب وبحبها وهى مرمية جريحة حرب بحبها بعنف وبرقة وعلى استحياء واكرهها وألعن أبوها بعشق زى الداء واسيبها واطفش فى درب وتبقى هى ف درب وتلتفت تلاقينى جنبها فى الكرب والنبض ينفض عروقى بألف نغمة وضرب ■ ■ ■ مصر النسيم فى الليالى وبياعين الفل ومراية بهتانة ع القهوة.. أزورها.. واطل القى النديم طل من مطرح منا طليت والقاها برواز معلق عندنا فى البيت فيه القمر مصطفى كامل حبيب الكل المصرى باشا بشواربه اللى ما عرفوا الذل ومصر فوق فى الفراندة واسمها جولييت ولما جيت بعد روميو بربع قرن بكيت ومسحت دموعى فى كمى ومن ساعتها وعيت ■ ■ ■ أنا اللى اسمى حتحور.. أنا بنت رع مثال الأمومة ورمز الحنان تفيض حلماتى وتملا الترع وتسقى البشر كلهم والغيطان نهايته يا مصر اللى كانت أصبحت وخلاص تمثال بديع وانفه فى الطين غاص وناس من البدو شدوا عليه حبال الخيش والقرص رع العظيم بقى صاج خبيز للعيش وساق محارب قديم مبتورة ف أبو قرقاص ما تعرف اللى بترها سيف والا رصاص والا الخراب اللى صاب عقل البلد بالطيش قال ابن خلدون أمم متفسخة تعيش ليش وحصان صهل صحى جميع الجيش ■ ■ ■ النخل فى العالى والنيل ماشى طوالى معكوسة فيه الصور.. مقلوبة وأنا مالى ياولاد أنا ف حالى زى النقش فى العواميد زى الهلال اللى فوق مدنة بنوها عبيد وزى باقى العبيد باجرى على عيالى باجرى وخطوى وئيد من تقل أحمالى محنية قامتى.. وهامتى كأن فيها حديد وعينيا رمل العريش فيها وملح رشيد لكنى بافتحها زى اللى اتولدت من جديد ■ ■ ■ مصر.. التلات أحرف الساكنة اللى شاحنة ضجيج زوم الهوا وطقش موج البحر لما يهيج وعجيج حوافر خيول بتجر زغروطة حزمة نغم صعب داخلة مسامعى مقروطة فى مسامى مضغوطة مع دمى لها تعاريج ترع وقنوات سقت من جسمى كل نسيج وجميع خيوط النسيج على نبرة مربوطة أسمعها مهموسة والا أسمعها مشخوطة شبكة رادار قلبى جوه ضلوعى مضبوطة ■ ■ ■ وترن من تانى نفس النبرة فى ودانى ومؤشر الفرحة يتحرك فى وجدانى وأغانى واحشانى باتذكرها مالهاش عد فيه شىء حصل أوبيحصل أو حايحصل جد أو ربما الأمر حالة وجد واخدانى أنا اللى ياما الهوى جابنى وودانى وكلام على لسانى جانى لابد أقوله لحد القمح ليه اسمه قمح اليوم وأمس وغد ومصر يحرم عليها.. والجدال يشتد صلاح جاهين
