كلمات ليست كالكلمات

فوقى يا مصر من اللى جرالك.. إيه اللى بيحصل فيكى وليه؟.. من فترة ومتغير حالك.. ضحكت كل الدنيا عليه.. من كارثة لكارثة بنتقلِّب.. على حالنا بقينا بنستغرب.. شباب بيسيبك وبيهرب.. ويسيب أحبابه على عينه.. أطفال فى شوارع مرمية.. وضحايا فى أنقاض منسية.. ومؤهل يمسح عربية.. وصاحبها بيبصم بإيديه.. وآدى ناس بتبيع كليتها.. علشان تصرف على بيتها.. وديون فرمتها وقسمتها.. وفى ناس بتبات فى شاليه.. وبيوت تتهد على صحابها.. ولا مسؤول يوم يخبط بابها.. وفى ناس عاشت كل شبابها.. مش لاقية مكان تسكن فيه.. أنا هاسأل مين غيرك.. إنت ليه فى كل مكان ضاعت قيمتى.. مفضلش فى أرضك ولا سنتى.. ولا حلم جميل إلا وبعتيه.. فوقى يا مصر من اللى جرالك.. إيه اللى بيحصل فيكى وليه؟
محمد الشقيرى
>سبَّخوها بالسباخ.. غيَّروا بيها المناخ.. ثم لما لما لما كعبلوها.. الخريطة شخبطوها.. والبسيطة عقَّدوها.. حتى أرضك بوَّروها.. ثم لم ولم يزرعوها.
منصور عبدالعال الإسكندرية
>ومهما القهر ده فينا يكسر ولا نتأثر.. ومهما يعلو جدار الخوف.. برضه ف قلب العتمة نشوف.. ولو العيشة كابوس واتحقق برضه بنعشق.. كلمة رفض.. وصوت بيسبق.. صوت الرعد.. ومهما الحزن ح يجى يسوِّد لون فرحتنا.. وجيش الباطل عايزنا نحود عن سكِّتنا.. صوت الحق ده فينا اتعود ما يسكِّتنا..
إسلام سلامة
عضو اتحاد كتاب مصر