ده إحنا مؤمنين ومؤمنين ومؤمنين

سألنى صديقى مستاءً: تفتكر ليه ما بقيناش مؤمنين؟! اندهشت وفتحت بقى على آخره وسألته: من قال إننا غير ذلك؟ فأجاب: هو المثل مش بيقول إن المؤمن منصاب؟ قلت له: أيوه.. بيقول كده! فرد مسرعاً: طيب يا أخى يبقى إحنا مش مؤمنين! وعاجلنى بتفسيره حيث قال: إحنا بتحصل المصايب فى كل الدنيا، وتلاقى المصريين تمام التمام! انفجارات فى الهند تطلع السفارة لا يوجد ضحايا مصريون!
ينهد برجا التجارة العالميان تعلن السفارة: المصريون بعيدون عن الخطر! تحصل انفجارات فى السعودية تخرج السفارة معلنة: المصريون تمام التمام! الأزمة الاقتصادية تطحن أمريكا وكل الاقتصاديات تخرج الحكومة مؤكدة: لا ضرر من الأزمة الاقتصادية! القرصنة توقف حال ناس كتيرة فى العالم إلا القناة، ويخرج علينا رئيس الوزراء ورئيس هيئة قناة السويس يؤكدان أنها تمام التمام! وبصراحة أنا استغربت إن لقيت ضحايا مصريين بين ركاب العبارة السلام،
 كنت أنتظر السفارة أو الحكومة تخرج علينا لتطمئننا على المصريين!! فصرخت فى وجهه: يا أخى حرام عليك يعنى إنت فاكر اللى ربنا نجانا منه، وناسى كل المصايب اللى بتحل بينا، وبعدين يعنى مش كل ما يقال يصدق، والبيانات اللى بتطلع عن سفاراتنا بتبقى بيانات أولية، وبعدين تعال هنا يعنى الخصخصة..
 الصكوك اللى ما حدش عارف للآن إيه مكاسب الحكومة وإيه المغرز اللى مرتباه لنا، والأحزاب التعبانة اللى بتاكل فى بعضها، ومجلس الشعب اللى أعضاؤه بيناموا وبيقزقزوا لب، وحريق مجلس الشورى، وغرق المصريين بأعداد كبيرة على شواطئ اليونان وإيطاليا، والشرطة واللى بيعملوه فينا، والمصريين اللى بقوا ملطشة الكل بره بلادهم، وصخرة الدويقة اللى وقعت دى مش وقعت على مصريين؟
 وحوادث الطرق اليومية المعتادة رغم قانون المرور.. والغلاء والضعف اللى صاب المنظومة التعليمية والتربوية، وفواتير التليفونات.. يا راجل اتقى ربنا ده إحنا الإيمان نفسه.. يا راجل حرام عليك مش عشان أوقات ربنا بيسترها من ناحية، يبقى إحنا مش مؤمنين، ده من لطف ربنا بينا.. الدور والباقى على اللى بنعمله فى نفسنا.. مش كده ولا إيه؟
مينا ملاك عازر
menamallak@gmail.com