مصر.. التى

احكيلكوا عن مصر اللى أنا وأنت وهو عارفينها.. قول خمسة مليون كده فاهمينها وعايشينها.. مستورين وحامدين وشاكرين وساكتين.. فاهمين «الفولة» مفيش فايدة حافظينها وبالعينها..
■ والثانية آه
على عشرة مليون تحتنا نفسهم فيها بس مش طايلينها.. يجروا طول الليل بعد العذاب بالنهار لحد ما يتعشوا.. ويتخمدوا بس برضه مش ملاحقينها..
■ والثالثة آه
على خمسة وخميسة وخمسين مليون عليهم ودول بقى مدفونين فى كواحيلها.. يا عينى عليهم يا طايحين وجامحين يا نايمين فى شوارعها.. لا صحة ولا تعليم ولا مراية ولا سلاية ولا هدمة لابسينها..
■ والرابعة آه
سيبك بقى من البؤس والفقر وتعال نروح جناينها.. مارينا.. وهارينا.. وسارينا دايبين فى خيرها ومعجونين ومعجبين بسواحلها.. ما يجوش مليون ورب الكعبة واكلينها وزالطينها.. باشوات وبهوات وعلى كل لون وهى والعة شاربينها.. وبيبصوا علينا من فوق ومن فوق الفوق وشايفينها.. وبيسألوا بعض مين دول؟.. قصدهم إحنا!.. قاعدين ليه مضايقينها.. اطمنوا والله وما تقلقوش خالص.. يا إما حنموت كده! يا إما ماشيين مسافرين وسايبينها!
د.محمد نصر المسيرى