سطور الآهات

■ إزى الصحة يامة.. إزى حالك .. وحشانى والله يامة .. ووحشنى سؤالك .. فينك رحتى يامة.. وراح فين جمالك.. مهموم والله يامة.. وخايف م المهالك.. أصل احنا يامة حالنا.. ماكنش هو حالك!
■ يا حكيمة يا أصيلة.. الغدر طال عيالك.. واللى خيرك عليهم.. طمعوا وعايزين مكانك.. فين المجد يامة؟.. وراح فين زمانك!.. يا أم الهرم والنيل.. مش هما دول جيرانك؟.. ولا مكتوب عليك تمشى فى طريق المهالك.. وفيه ناس والله يامة.. طريقها مرصوف وسالك.. وليالى العتمه تجيلك ما حد ينطق بمالك!
■ والله يامة بحبك.. وبخاف على مكانك.. من الجيران والأعادى.. قلقان على حيطانك.. بس انتى يا غالية ساعات.. بتسوقى يامة فى دلالك.. وبتكرمى الغريب.. وبتنسى فى لحظه عيالك!!
■ لكن أنا يامة عاشق قساوتك زى ما بعشق حنانك.. وطول ما روحى فىّ.. ما حد يقدر يقرب.. من نيلك ومن مكانك.. ومهما العتمة طالت.. أنا ليكى وانتى ليا وما ننسى أبدا جيرانك.. ما هو برضه انتى الكبيرة.. والكل عاشق جمالك.. وما بين سطور الآهات.. وفى لحظة السكات.. مااحلاه يامة كلامك!
مصطفى السرتى