مشكلة العنوسة

عدا العمر وطول سنين نفسى اتجوز بس منين
أزمة وأنا مش لاقى مكان مش لاقى أوضة ولومترين
مستنى الفرصة شباب إسكان واسطة كمان متر بألفين
وبعد ما تيجى الشقة يا سيدى يقولوا مكان بلدى ومش زين
عايزين شقة براح وسوبر منطقة راقية تملا العين
جبنا الشقة أزمة تحلت قالوا الشبكة ومهرك فين؟
معاى أخلاق وشهايد يامة قالوا دى ورقة تجيب قرشين
تيجى مسابقة فيها وظيفة قالوا داحلم طويل عمرين
عايزين حاجة آخر موضة دهب ألماظ وهدايا صنفين
نادى لحفلة ودخلة ف فندق خمسة نجوم معازيم صفين
وكمان قايمة كبيرة تشرِّف قلت فقير مكسورقلبين
قالوا فقير وجاى تتجوز هات جهازك قسط ودين
قلت الرحمة يا خلق الله دا النسبة رحمة بين الطرفين
قضيت العمر أذاكر واقرا سهرت ليالى شارب مرين
تقاليد وعادات وبناتنا غالية وشهر عسلها يكون شهرين
قلت يا ناس الحمل تقيل قالوا جاى غيرك عريسين
رحت مبطل أنا جواز وبقينا عوانس إحنا الاتنين
ليه مجتمعى أنا يظلمنى؟ نفسى أعيش الفرح يومين