بكرة.. مش مهم الساعة كام

من طابور المدرسة.. وكشف الغياب والحضور.. وقسوة مكتب التنسيق، وأمن الجامعة والبوابات الحديد والسور.. من حيرة شارع قصر العينى.. وحزن ميدان الجيزة.. بيتولد عصفور.. يزقزق.. يحلم.. يغنى.. يزوغ من حصة الكيميا ويترمى ف حضن بيرم وقلب سيد درويش.. ويرسم ضحكة بيضا.. زى الحليب البكر والجبنة القريش.. صباح الخير.. صباح النور.. تلف الدنيا، وطول عمرك يا مصر بتصدقى إحساسك.. وقلبك إلا قلبك لا يمكن ف يوم يخذلك.. فيه شىء جواكى دايما بيطمنك..
عزيزى القارئ.. أنا كنت بتكلم عن شاعر.. اسمه هيثم دبور.. ظبطه ف قلب الدوشة بيسمع فيروز.. طالع من الثانوية العامة بجسد نحيف ضعيف.. لكن روحه ولا خدش.. وف قلبه مليون حكاية.. تعالى نسمع سوا.. وهو بيقول.. واحشنا دخلتك ع البيت بكيس فاكهة.. ومزاج رايق.. واوعى تجلنا متضايق.. ولو باقى علينا بجد.. بلاش تستنى بره الشيش.. وشوف الشقاوة دى وهو بيقول إيه... صباح الفل يا اسمك إيه.. يا حضنى الدافى ف الغربة.. يا فركة إيد عشان ندفى.. صباح شاى ف حضن حليب.. مهوش بودرة.. صباح لاضم ف خيط بكره.. صباح مفيهوش نسيم عادى.. صباح نادى.. صباح الفل يا بلادى.
معكم.. هيثم دبور كل يوم جمعة
8800962 قومى
لما تتغير بطاقتى
فى السنة السابعة يا فندم
الموظف مش هيتعب
ما البيانات هيه هيه
هفضل أعزب
مش هلاقى أى واحدة ترضى بيا
والجيوب مفهاش مرتب
مش هفكر حتى لحظة فى الخطوبة
أما نوعى..
لسه راجل بس ماتت فيه الخصوبة
لسه قورتى عريضة زى ما صورتى قايلة
لسه عايش بالمحايلة
جوه 16 ممر أحمد مُحرم
بالمقطم
نفس عنوان الإقامة والديانة
كل بياناتى مطابقة إلا خانة
كنت طالب..
باخد المصروف بإيدى من أبويا
أما دلوقتى فخريج..
بس عايش ع الإعانة
هيثم دبور