ريحنا م الأحزاب

«سيدنا» إدا الولد إجازة م الكتاب
وقال له روح بالعجل للحاج عبدالتواب
إعرف لى منه الخبر واسأل عن الأحزاب
وقوللى مين منهم صادق ومين كداب
الواد جرى بسرعته عارف طريق الدار
وف لحظة غاب واختفى عن كافة الأنظار
والحاج لما وصل قال له على الأخبار
وإداله حبة ورق يديها للشيخ دار
الشيخ وصل له الخبر عاجل مع المرسال
قلب فى كل الورق واتصفح الجرنال
وف وشه بان الفرح م اللى اتكتب واتقال
الكل عايز البلد تبقى فى أحسن حال
سيدنا من فرحته قام يجرى ع الميدان
نادى وقال كلمته للأهل والخلان
والجمع كله اتجه بالدعوة للرحمن
يارب ولى اللى يقدر يسعد الإنسان
مرت سنين والبلد كل اللى فيها هباب
الخير بحاله اتحجز للص والكداب
والشيخ بقت دعوته يا رب يا وهاب
خلصنا من غلبنا ريحنا م الأحزاب
وسيم سلامة - عضو اتحاد الكتاب