مسحراتى.. فلسطينى

مسحراتى مصر البهية
اصحى وسبّح رب البرية
مشيت ارتّل وأنشد وأجوّد
وصوتى يجرى بين النواصى
هنا بانقّر.. هنا باعوّد
هنا باحوّد عن المعاصى
لو كنت بحرى
لازم أقبّل
وإن كنت قبلى.. لازم ابحّر
ولحد آخر نفس فى صدرى
هاشد قلبى وتر وأسحّر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البرية..
مسحراتى ويقينى
بين الليالى بيهدينى
أسرى ف دروبها كأنى براق
وكأن ربى موصينى
خطوة حنان بتحركنى
نظرة أمل بتودينى
على بحيرة طبرية
مريم بإيدها بتسقينى
وإما يوحنا يعمدنى
جبريل.. بنفسه يوضينى
ف الناصرة وبيسان وجنين
أزرع وأحصد فدادينى
أعود ف حضن القدس جنين
وأوهب حياتى فدا.. دينى
أختار ملامحى وأكدها
على شكل أرض فلسطينى
■ ■ ■
ما أنا أصلى أول عشاقها
وحسى أول أغانيها
من أول الله ما خلقها
قبل الشيطان ما يخطيها
أنا كنت آدم جنتها
وكنت قوة عزوتها
وكنت زيتون شجرتها
صحاريها كانت بساتينى
أختار ملامحى وأكدها
على شكل أرض فلسطينى
مشيت على أرضها إنسان
وعرقى فرحان بحصاها
ورفعت فيها بقلبى أدان
ولسه قبلتى أقصاها
أعدائى هم أعداؤها
أعضائى بتلبى نداءها
دمى اللى سال من شهدائها
لسه حنانه ف شرايينى
أختار ملامحى وأكدها
على شكل أرض فلسطينى
■ ■ ■
مريم يا كل محبينها
جيّالى شايلة بشاير نور
ولا كانش فيه بينى وبينها
ولا نفق ولا سلك وسور
من بوابتها.. من المساعيد
عمرو اللى قال إن المسا.. عيد
بيقول يا مصر دا حلم جديد
وإنتى اللى بكرة هاتحمينى
أختار ملامحى وأكدها
على شكل أرض فلسطينى
■ ■ ■
دم المقاومة ف شعر فصيح
شعر المقاومة ف دمى يعيش
حتى النهارده قريت لسميح
توفيق زياد.. محمود درويش
الشعر كان مكتوب بالدم
والهم كان موصول بالهم
تمشى معايا ف سكتى.. أم..
هاتروح بعيد وتخطينى؟!
أختار ملامحى وأكدها
على شكل أرض فلسطينى
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب