بكالوريوس فى حكم الشعوب (2)

وقف ثمانية من طلبة المدرسة الثانوية العسكرية فى بلد من بلدان العالم الثالث فى حالة انتباه صفاً واحداً أمام المشرف فى عنبر النوم، الذى أبدى استياءه وأعلن فشله فى تعليم هؤلاء الطلبة القواعد والأصول العسكرية رغم أنه خريج أكبر كلية عسكرية فى بريطانيا..
بينما انتقد مدير المدرسة المجموعة «أ» من سنة أولى لعدم وعيهم بحال البلد بعد خمس سنوات من استقلاله وعدم قدرتهم على تأسيس جيش محترف وقوى يحمى ثرواته العائمة على بحيرة بترول فى صحرائه الشاسعة، خاصة مع تصريح ولى العهد لوكالات الأنباء «إنه مايقدرش يحكم ويسيب أعماله التجارية»!
الحلقة الثانية
الوكيل يمسك ببضعة كتب أخرى
الوكيل: كتب تاريخ.. وياريت تاريخنا اللى كله شجاعة وبطولة.. تاريخ أجانب..
طارق: فيه تاريخنا يافندم تحت المخدة..
المدير: ثابت..
المشرف: ولا حركة.. عامل لى زعيم فى وسطيهم.. وكل كلامه وأفكاره مستوردة من بره المدرسة..
المدير: شهر حرمان من الفسح.. وسبعة حجز قشلاق.. «ينظر فى الورقة وينادى» سعد السياف..
سعد: أفندم..
المشرف: للخلف در.. خطوة للأمام مارش..
الآن يواجه الصالة
المشرف: دائم الإخلال بالضبط والربط وحسن انضباط المظهر العسكرى.. امبارح مريت عليه فى الخدمة لقيته نايم..
الوكيل:الحاجات دى تحصل من حد تانى يا سعد يا سياف.. إنت الوحيد اللى يجب أن يكون قدوة فى الضبط والربط.. إنت من عيلة كلها سيافين.. أباً عن جد.. أبوك الله يرحمه كان بيحط الخمسة جنب بعض ويضرب رقابيهم بالسيف.. ضربة واحدة.. عارف كده والا ماتوعاش عليه..؟
سعد: عارف يا أفندم.. كان بياخدنى يفرجنى وأنا عندى تلات سنين.. عشان كده لما باشوف لون أحمر بأحس إنى عاوز أتقايا..
الوكيل: لأنك خرع..
سعد: حاضر يا أفندم..
الوكيل: ثابت..
المشرف: ولا حركة..
يخرج بعض الكتب من تحت المرتبة
الوكيل: شعر.. وقصص حب.. وقلة أدب.. طالع رقيق لمين ياخويا؟.. إنت عاوز تلوث تاريخ عيلتك؟.. ماكنت تدخل ثانوى أحسن لك وتدخل كلية الآداب.. عشان تجيب لأهلك العار..
المدير: شهر حرمان من الفسح.. وخمسة حجز قشلاق.. غيره..
المشرف: أحمد تعيلب..
أحمد: أفندم..
المشرف: للخلف در.. خطوة للأمام مارش.. ده أحسن طالب عندى مثال للضبط والربط.. حايفسد لو فضل فى المجموعة دى..
الوكيل: مش انت ابن تعيلب بتاع الشرطة..؟
أحمد: أيوه يافندم..
الوكيل: ونعم الناس.. عيلتك يابنى ولمدة مائتى سنة قدمت للبلد أحسن مخبرين.. جدك الكبير تعيلب البراق ابن البصاص.. كان يبص من خرم الباب يعرف اللى قاعدين جوه بيفكروا فى إيه..
المدير: «باستياء»... غيره..
المشرف: إبراهيم كروان..
إبراهيم: أفندم
المشرف: للخلف در.. خطوة للأمام.. مارش..
الوكيل: كل جدوده وأعمامه من كبار رجال الفقه والنحو واللغة.. ومع ذلك أبوه طلع مغنى.. مش كده؟
إبراهيم: أيوه يافندم..
الوكيل: أبوك غلبنى لما كنت ماسك الأمن فى بلدكم.. أيام ما كان الغنا حرام... كان عامل أوضة تحت الأرض بيغنى فيها لأصحابه، ويعزف لهم على العود.. حاصرته عشر سنين.. ومع ذلك فشلت أضبطه متلبس.. إوعى تكون طالع له..
إبراهيم: «باستنكار شديد».. أعوذ بالله يافندم.. أعوذ بالله..
المدير: معلوماتى إنك أحسن واحد يعرف عربى فى المدرسة..
إبراهيم: تقريباً يا فندم..
المدير: أمال مين اللى كان بيغنى فى الميز امبارح بعد العشا؟
إبراهيم: أعوذ بالله يا أفندم.. ما كنتش بغنى.. كنت باقول تواشيح..
الوكيل يخرج من سريره عدة شرائط كاسيت وجهاز ريكوردر صغير
الوكيل: أغانى وتواشيح من كل نوع..
المدير: شهر حرمان من الفسح.. وخمسة حجز قشلاق.. غيره..
المشرف: الأربعة اللى فاضلين من الجماعة لا حول ولا قوة.. لكن حايفسدوا.. طارق الريس بيحكى لهم حواديت من التاريخ وبيشرح لهم حاجات تانية منيلة بستين نيلة.. أسامة الزهار.. خليل الجمال.. مرسى محمد أحمد.. حسن أبوجراب.. للخلف در.. خطوة للأمام.. مارش.
المدير: أسبوعين حرمان من الفسح.. وثلاثة حجز قشلاق.. على سبيل التحذير.. عشان تصحصحوا.. «لإبراهيم» إبراهيم..
إبراهيم: أفندم..
المدير: تعال لى مكتبى بعد ربع ساعة..
إبراهيم: حاضر يا أفندم..
المدير: «للمشرف».. وزع الخدمات..
الضابط المشرف يحييهما، يخرج المدير والوكيل
المشرف: أسامة..
أسامة: أفندم..
المشرف: سور الكلية الغربى.. خليل..
خليل: أفندم..
المشرف: سور الكلية البحرى.. حسن..
حسن: أفندم..
المشرف: السور القبلى.. سعد..
سعد: أفندم..
المشرف: باب السلاحليك.. صفا.. انتباه.. انصراف..
إظلام سريع للإضاءة مع كلمة انصراف وتصاعد المؤثر الصوتى لمدة عشر ثوان ثم ظهور تدريجى للاضاءة
المشهد الثانى
ظهور تدريجى للإضاءة على أحمد تعيلب وقد بدأ يخلع ملابسه ويرتدى البيجاما.. يدخل طارق الريس..
أحمد: حرقت كل الكتب؟
طارق: مش كلها.. اللى شافوها بس.. الكتب المهمة ماشافوهاش.. لأنها جوه القطن بتاع المرتبة.. يعنى انت يابو حميد طلعت أحسن طالب فينا..
أحمد: طبعا.. أنا طالب مثالى..
طارق: مثالى فى إيه ياخويا؟... إنت بتعمل كل المصايب اللى فى الدنيا..
أحمد: لكن متغطى.. متدارى.. مش المهم الإنسان يبقى كويس المهم إن الآخرين تبقى فكرتهم عنه كويسة..
طارق: فى الغالب حاتطلع الأول علينا.. ولما نتوزع على الأسلحة، حاتسبقنا فى الترقية..
أحمد: أنا دخلت المدرسة العسكرية عشان هدف واضح محدد..
طارق: تبقى ضابط كبير..
أحمد: تؤ..
طارق: رئيس مجلس إدارة شركة؟
أحمد: تؤ..
طارق: بطل عسكرى، من أبطال حرب الاستقلال.. لسوء حظك الاستعمار خرج من عندما بمزاجه..
أحمد: الأهداف الخيالية دى يفكر فيها اللى زيك.. «لحظات».. أنا فى أول فرصة حاعمل انقلاب.. وأمسك الحكم..
طارق: إيه... يخرب بيتك..
غداً الحلقة الثالثة