قرآن كريم

مسحراتى مصر البهية
اصحى وسبح رب البرية
مشيت ارتل وانشد واجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم اقبل
وإن كنت قبلى.. لازم ابحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى.. مهما يهيم
على جناح السماح مقيم
صراطى واضح ومستقيم
وف قلبى شايل.. قرآن كريم
أتلوه حباً.. عشقاً ونوراً
يعطينى علماً.. من كل سورة
من كل آية.. خيراً.. عميم
■ ■ ■
لنا كتابٌ لا ريب فيه
بيسرى فينا ونصطفيه
يسعد حياتنا لو نقتفيه
عِبَر وحكمة من الحكيم
صراطى واضح ومستقيم
وف قلبى شايل قرآن كريم...
«اقرأ» بتفتح باب العلوم
والعلم يشفى من الهموم
وعن سمانا يجلى الغيوم
هذا مقامٌ.. فيه النعيم
صراطى واضح ومستقيم
وف قلبى شايل قرآن كريم
■ ■ ■
«الفاتحة» فاتحة سماء صعود
للملك مالك.. له الخلود
والخلق جمعاً رُكع سجود
نحيا بحكمة رحمن رحيم
صراطى واضح ومستقيم
وف قلبى شايل قرآن كريم
■ ■ ■
سلسال معانى إعجاز بيان
هدى ورحمة وبشير أمان
للجنة قلبى شاهد عيان
وعينى تنجو من الجحيم
صراطى واضح ومستقيم
وف قلبى شايل قرآن كريم
■ ■ ■
محتاج يارب.. وانت اللى اعلم
لسان يرتل.. وعقل يفهم
وقلب كل ما يقرا.. يسلم
بحق جاه النبى العظيم
صراطى واضح ومستقيم
وف قلبى شايل قرآن كريم
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب