مبروك الاعدام .. يارجالة

لم ولن اكون فى يوم من الايام واحد من الاخوان ولاحتى من اللى بيتعاطفوا معاهم ولا بيحترموهم وبنفس الدرجة لم ولن اكون واحدا من اللى بيطبلوا لسيادة المشير السابق والريس الحالى
انا واحد عايش بدماغى الحرة المستقلة اللى النهاردة مع راى فلان وبكره مع وجهة نظر علان واللى بيحاول ما يغيرش مبادئه الخايبة مهما حن عليه الزمن او مال وما يضرش برده انه يغير مواقفه اذا اكتشف انه ماكانش على حق واهو بيتعلم ويموت الزمار والزمارة فى ايده ويموت المتعلم ولا يتعلم امى الله يرحمها كانت بتقول كده .
وكانت بتقول كمان امشى عدل يحتار اسمه ايه ده فيك وقالت وعادت كتير بس تعلم فى المتبلم ودايما يصبح ناسى ايه بقى لازمة الكلام ده واللت والعجن ده دلوقتى حاقولك ياسيدى لازمته ان الناس وانا وانتى وهما ودوكوهما شايفين ومش قادرين يقولوا كفاية حرام
والكفاية هنا احكام الاعدام اللى نازلة طالعة ترف على اخوانا المسلمين واللى بقت زى اللبانة فى البق اى واحد اخوانى ولا واحد من اللى بيمشوا معاهم فى المظاهرات يقوموا يقفشوه وبسرعة على النيابة يودوه وبعدين للمحكمة بعد السجن المعتبر يحضروه وقوم ايه بالاعدام يطسوه
واعرف ناس منهم من الجيران والاصدقاء القدامى اتحكم عليم ب5 عشر سنين لانهم هتفوا ضد العسكر وناس ما اعرفهمش اتحكم عليه اعدام حضورى وبعضهم غيابى لانهم مشيوا فى مظاهرة ولا حرقوا عربية شرطة ولا رموا اسمه ايه ده المولوتوف .
وانا لا اطلب لهم البراءة فالمخطئ اذا اخطا ينال عقابه ولكن ما تبسطوهاش قوى كده ده حتى هيبة الاعدام تلروح بالشكل ده واللى ياخد اقل منها يبقى ولا مؤاخذة هفية
اقيموا دولة العدل وبالقانون ولكن لا تشرعوا قانونا بالتفصيل لفصيل معين ولا تجعلوا الناس ولاسمح الله تشكك فى حيدة ونزاهة القانون وهيبة القاضى الذى يحكم حكما ويحاسب عليه يوم القيامة اما الذين ينتظرون المحاكمة فمقدما مبروك عليكم الاعدام يارجالة ؟
المشهد .. لا سقف للحرية
المشهد .. لا سقف للحرية