فيديو.. إبراهيم عيسى تعليقا علي وقف "حلاوة روح ": دي الحرية اللي بتتكلموا عنها !

انتقد الكاتب الصحفي إبراهيم عيسى، قرار المهندس إبراهيم محلب، رئيس مجلس الوزراء، وقف عرض فيلم «حلاوة روح» وعرضه على هيئة الرقابة على المصنفات الفنية لاتخاذ قرار نهائي بشأنه، وتساءل: «دي الحرية والديمقراطية اللي بتتكلموا عنها؟».
ووجّه «عيسى»، في حلقة برنامجه «25/30» على قناة «on tv»، مساء الأربعاء، تساؤلاته إلى حكومة محلب، قائلًا: «ليه هى هيئة المصنفات الفنية ماخدتش قرار بشأنه قبل عرضه»، لافتًا إلى أنه غير مهتم بالفيلم ولم يشاهده.
وقال: «اللي يمنع فيلم عشان وحش يمنع فيلم عشان حلو، واللي يمنع فيلم عشان تجاوز أخلاقي يمنع فيلم عشان تجاوز سياسي»، مضيفًا: «كيف يسمح لنفسه رئيس حكومة أو حكومة أنها تتدخل في شأن رقابي لمصنفات فنية، ويأمن أى واحد للقانون إزاى؟».
وتابع: «قاعد في اجتماع لدعم السينما فتمنع فيه فيلم؟.. والمجلس القومي للمرأة إنت رأيك إن السينما بتعمل التحرش، طيب إذا كانت ميرفت التلاوي بتطلع كده أمال ياسر برهامي يطلع بإيه».
وأضاف: «ماحدش يقرب من السيرة الدينية وماحدش يقرب من المرأة.. طيب إيه اللي هيفضل إيه ظاهرة المنع والبحبحة في المنع؟، والمرأة منتتهك حقوق كثير لها، لكن أدافع عن المرأة بالجور على الإبداع؟».
واستطرد: «متأكد إن محلب مش فاضي يشوف أفلام وأكيد مش هيشوف الفيلم ده، والفيلم لا شفته ولا عايز أشوفه»، متسائلًا: «دي الحرية والديمقراطية اللي بتتكلموا عنها ده كفاح الحقوق والنشطاء إنها يمنعوا، لا يمكن تواجه الإبداع إلا بالإبداع».
وأكمل: «بعدين تجور على استقلال مؤسسات ويطلع الأزهر يقولك منع فيلم (نوح) طيب فيه مصنفات فنية، وبعد كده الأفلام اللي بتطلع ابعتوها على رئيس الوزراء»، معتبرًا أن «ده تطور في منتهى الغرابة وده منزلق هننزل فيه مش هنطلع تاني، وإحنا بنتكلم عن مجتمع يتدهور في مناخ الحرية، والقرارات دي أخطر من حكاية التظاهر وقانون منع التظاهر».