"للثورة رب" قصيدة جديدة للشاعر الثائر سعيد حامد شحاتة

للثوره رب وللميدان فرسان
اركب حصانك يا عظيم الشّان
واخلع ملامح عمرك الدبلان وهز الأرض
واعلن على المدنه إن موتك فرض
آن الأوان للورد يتمرد على الأشواك
آن الأوان للجنه تتزيّن وتستناك
آن الأوان للقلب يفتح باب
والروح تقف تضحك على الشباك
اركب حصانك يا ملاك الروح
مدبوح عشانك والوريد مدبوح
لاهتف وراك وأصرخ بصوت مبحوح
الناس دى ناسك والملايكه معاك
*****
اركب حصانك يا انكسار القلب
وارفع شعارنا ف عين ولاد الكلب
واقطع سكاتنا الصلب بسنانك
مين اللى كان وياك ومين خانك
مين اللى دانك فوق ساحات الضى؟
مين اللى داس على حلمك المفروط
واستنى موتك وانت ميّت حىّ؟
*****
اركب حصانك يا انتصار القلب ع الساحه
وازرع خطانا ف رملة الواحه
الحلم عمره ما ييجى بالراحه
والريح ما يفردش القلوع لجبان
*****
للثوره رب وللميدان فرسان وللعاشق مدى
للثوره رب وللميدان فرسان وللروح منتدى
اركب حصانك يا عظيم الشّان وما تلبيش ندا
واعلن على كلاب العدا الأحكام
الثوره لسه بتبتدى امبارح
والنصر لسه هيتولد قدّام