رسالة إلى أطراف متعددة

لم اعتد الكتابة بالعامية الا نادرا ، كما لا اعتقد انه من الضرورى ان يعلن اى كاتب فى بداية مقاله انه يعبر عن وجهة نظره الشخصية .. لكن لهذا المقال تحديدا ظرف خاص ، يضطرنى لكتابته بالعامية ، ويدفعنى للاعلان مسبقا انه يعبر عن وجهة نظرى الشخصية ، التى اعلم بالتأكيد ان هناك كثيرين ممن هم مثلى قد يتفقون معها بالذات من جيل شاب امتلك زمام المبادرة فحاول الجميع خطفها منه لاستعادة زمام الامور ، حتى وان بدا هؤلاء اقلية فى لحظات لا تدوم طويلا !
طيب ، نتكلم بصراحة ووضوح ، مصر مش راجعة تانى لورا ، مهما تصورتم ومهما حاولتم ، ولو نجحتوا فى ده كام يوم ولا كام شهر ولا حتى كام سنة ، فلا مؤاخذة انتم مش واخدين بالكم ان ده بس تعطيل وتأخير لان البلد تحط رجلها على اول طريق المستقبل ، ومحدش بيمنع المستقبل ولا يقدر ، المشكلة الاكبر ان انتم داخلين تحدى مع جيل ، بكل عيوبه ومزاياه ، هو اصلا صاحب ومالك المستقبل ده ، وفاهم ومدرك ان انتم ضيعتوا الماضى ، وبتهدروا الحاضر ، فمهما بدالكم انه ضعيف او مشتت او اقلية فى وسط المناخ المجتمعى اللى بتخلقوه وتصنعوه او حتى بتواجهوه بطرق تنفع فى الماضى مش للمستقبل ، ومهما حاولتم تحبطوه وتكسروا مقاديفه وتدفعوه يدور على اكل عيشه وحياته الفردية وبس او يفكر يسافر ويسيب البلد اللى مفيش فايدة منها ، فهو الحقيقة جيل مختلف ، لانه ابن زمن مختلف وتجربة مختلفة وقيم مختلفة ، جيل معندوش تابوهات او خطوط حمرا او حتى زعامات مقدسة .
جيل بيخلق كل يوم قيادته حسب الانتماء للموقف والهدف .. صح او غلط مش ده الموضوع ، المهم ان ده جيل هيمتلك المستقبل وهيغير البلد مهما حاولتم .. فمواجهة المستقبل واصحابه محكوم عليها بالفشل .
اه البلد فيها ازمة كبيرة ، واه فيه خصم مشترك ، واه فيه وضع امنى واقتصادى صعب .. وطبعا فيه مبالغات لا حصر لها فى توصيفكم لكل ده ، واستخدام لها فى تمرير ممارسات كتير مرفوضة ، ومتخيلين ان ده هيخلى الجيل ده يفضل ساكت !! تبقوا متعلمتوش الدرس للاسف .. كنا متخيلين - او على الاقل عندنا امل - انكم تكونوا مختلفين ولو بدرجة ، وانكم استوعبتوا الدرس ولو شوية ، وانكم فهمتوا ان الدولة محتاجة الثورة واصحابها وابنائها والمؤمنين بها ، بس واضح ان انتم زي غيركم مصرين اما تشوهوا الثورة او تستخدموها ، صحيح انتم اذكى من اللى قبلكم ، بس يا ريت تتأكدوا انه ممكن تخدعوا كل الناس بعض الوقت ، وممكن تخدعوا بعض الناس كل الوقت ، بس عمركم ما هتعرفوا تخدعونا كلنا طول الوقت .
البلد ، والناس ، والظروف ، وحاجات كتير اوى اتغيرت .. صحيح مش التغيير المطلوب ، بس اتغيرت ، وصحيح بتحاولوا بذكاء يحسب لكم تحتووا التغيير ده ، بس مش هينفع .. عارفين ليه ؟ لانه ببساطة سنة الحياة .. ولانه ببساطة يا تبقوا جزء من التغيير للافضل ، يا تتحملوا نتائج التغير للأسوأ ، يا التغيير ده نفسه هيوصلكم ويطولكم . احنا كمان عندنا اخطاء طبعا ، ومستفدناش برضه من دروس اللى فات ، ومننا اللى هتعرفوا تشتروه او تفسدوه او غيره ، بس هيفضل فى الاخر ان برضه ده جيل مختلف ، فارجوكم حاولوا تبقوا انتم اعقل مننا وتفهموا ده ، وعلى فكرة فيه كتير مننا عاقلين برضه وبيفهموا ، ولا متشددين ولا متعصبين ولا رافضين لتقدير وفهم الحسابات والمواءمات وغيره من ضرورات السياسة ، وايديهم ممدودة وقلوبهم مفتوحة وعقولهم شغالة ، مش علشان يخدوا حتة من التورتة .
لا ، المفاجأة بقى ان اغلبنا مش كده ، انما علشان احنا فى ثورة قامت علشان تبنى مش بس تهد ، لكن تبنى صح وبجد ، قصة مش مناظر يعنى .. واول ما نلاقيها بترجع لورا وبتستخدم فى خدمة مصالح ضيقة مش مصالح البلد ، وبتوظف لترتيبات تخدم اطراف معينة مش بتخدم عموم الناس ، مش هيبقى قدامنا اختيارات للاسف .. لان حكاية اننا نفضل نختار بين السئ والاسوأ ، او نختار بين حريتنا او امننا ، واكل عيشنا او كرامتنا ، مش ممكن تفضل موجودة حتى لو رجعت فى ظرف معين ولفترة مؤقتة .. وعلى رأى الفنان محمد منير (وحياتك لافضل اغير فيكى لحد ما ترضى على) .
وعلى فكرة .. كل ده مش تهديد والله ، اعتبروها نصيحة لوجه الله والوطن .. ولو مش كده فاعتبروه وعد .. ولو مش احنا اللى قدرنا نحققه ، صدقونا هيحققه غيرنا .. فكفاية تضييع وقت واهدار فرص كده .. وعلى فكرة برضه ، كل ده ملوش علاقة بالوطنية ، وانما له علاقة بشايفين المستقبل ازاى وفاهمين الثورة ازاى .. فلو مش شايفين ومش فاهمين ، سيبوا الموضوع لاصحابه ، واصحابه مش احنا ، اصحابه الناس ، بس بحر ارادتهم ووعيهم .. فبلاش تحاولوا تتلاعبوا لا فى ارادتهم ولا وعيهم ، لانه مهما جاب اثر دلوقتى فهو مؤقت جدا ، وفى الاخر النتيجة حتمية ، الماضى مش بيحكم المستقبل ، انتم مش راجعين ، واحنا اللى جايين .
اللهم بلغت .. اللهم فاشهد .
_____________
* المتحدث باسم التيار الشعبي