"وخداني لفين" ..قصيدة جديدة.. للشاعر كرم فصاد

"وخداني لفين"
وخداني لفين
من بعد ما عدَّى العُمر وراح
وسنين العُمر..
أجيبها منين
وأديها لقلبك من تاني
ما كفايه جراح
دا أنا قلبي رهيف
بيموت ف الحِس الإنساني
وكفايه أنين
دي عواصم قلبي الوحداني
تستسلم ليكِ بكل حنين
وقعدنا ساعات..
نقسِم في حاجات
أوقات أحزانك وأحزاني
شُفتك حسيت..
عنِّك وداريت..
إحساس القلب الجُوَّاني
والهوى روَّاح
والقلب ضعيف
لا هو قادر يُصبُرْ ولا يرتاح
يا تروحي بعيد..
من غير مواعيد..
من قبل حنين القلب يزيد
يا تعيشي ف قلبي ووجداني.
كلمات: كرم فصاد