"بلاك بلوك" تدعو للتظاهر غدا.. وتحذر "الصيرفى": "إنت قتلت نفسك بنفسك"

حذَّر عدة مجموعات "بلاك بلوك" النشطة على فيسبوك من التعامل مع شريف الصيرفى باعتباره منتميًا لعالم "بلاك بلوك"، ودعت إلى تظاهرات غدا الجمعة تحت شعار "القصاص أو الرحيل" فى الإسكندرية والقاهرة أمام قصر الاتحادية.
وقال بيان مشترك لهذه المجموعات بعد أن تم قتل وسحل وتعذيب المصريين والمتظاهرين السلميين، حسب البيان، ندعو شعب مصر في جميع المحافظات للتجمع أمام قصر الاتحادية غدا.
على جانب آخر، أكد عدد كبير من تلك المجموعات فى بيان مشترك أن الناشط شريف الصيرفى الذى أثار جدلا على إثر ظهوره بوسائل الإعلام واختفائه خلال الأيام الماضية واستهدافه من الأمن، لا ينتمى ل"البلاك بلوك" من قريب أو بعيد، مؤكدًا أن من ينتمون لها ليس لهم أى حق فى التحدث باسمها، فضلا عن كونهم ممنوعون من الظهور إعلاميا وفق قواعد الحركة.
حذرت المجموعات من التعامل مع الصيرفى باعتباره منتميًا لعالم "بلاك بلوك "، مؤكدة أنه يسعى للشهرة موجهة له انتقادات حادة، حيث أوضحت عبر بيانها آلية عملها وكيف بدأت الفكرة وتسلسلها القيادى.
وفى انتقادها للصيرفى وظهوره قالت "طلع ومكتوب تحت اسمه زعيم البلاك بلوك، طلع بوجهه، وقال إنه صاحب الفكرة، وقال هيبقي كل الثوار في كيان البلاك بلوك، وقال لفظ حل رابطة البلاك بلوك، وكل شوية يقول علي نفسه واجهة، وقال الناس قالت له يطلع وهما هيحموه، ورجع يقول البلاك بلوك مالهاش قيادة".
تابعت قائلة "والرد عليه: أولا مفيش بلاك بلوك بيطلع ويقول علي نفسه بلاك بلوك ولا بيقول هنعمل أو عملنا، وثانيا البلاك بلوك أنت مش صاحب فكرتها هي فكرة عالمية واللي نقلها لمصر شباب بقالهم 3 شهور شغالين عليها، والثوار كلهم مش هيبقوا في كيان واحد ممكن يبقي كتير منهم في مجموعات بلاك بلوك متفرقة، لكن مش كلهم لأن صفات البلاك بلوك وعقليتها مش هتتناسب مع كل الثوار.. بس كتير هيبقي مؤيد مش أكتر".
وأضافت "رابعا مفيش حاجة اسمها رابطة ده تنظيم وفي تنظيمات مش تحت إيد أي حد وهي في الآخر فكرة مش في استطاعة حد يوقفها، خامسا احنا كنا بننزل في مذابح الثورة.. والمذابح اللي جاية احنا اللي هنعملها، و انت لا واجهة ولا تنفع والبلاك بلوك وجهته هي فكرته وأفعاله".
واختتمت "سابعا مفيش حد باستطاعته أن يحميك.. أنت قتلت نفسك بنفسك.. أنت مش بلاك بلوك عشان كدا محدش هيهتم بيك، البلاك بلوك تنظيم هرمي وله قيادة ومجموعات قيادات تحت القيادة، ومفيش حاجه اسمها الرئيس مرسي أصلا.. شرعية الشخص دا سقطت.. ومفيش حد ديكتاتور علينا.. احنا أحرار"، حسبما قالت.