كله رجع.. لقديمه

بيقولك: الفنانة بوسى رجعت للفنان نور الشريف بعد هجران دام لسنوات، وكمان سمنة الهانم.. اللى صدعونا بيها إعلانات. رجعت بس.. بطاقية صفرا، وضيف عندك.. إن المطرب اللبنانى اسمه ايه ده اللى استشيخ وقالك الفن حرام وراح حارب بشار فى سوريا وعمل حاجات تانية كتير هو كمان.. رجع فى كلامه وقرر يرجع للغنا تانى. وبعدين بيقولك: إن البرنامج الشهير.. البيت بيتك اللى كان أيام عز الوطنى وجمال وعلاء مبارك بيتذاع فى القناة التانية المصرية الحكومية رجع للعرض فى قناة خاصة. اسمها: تن يعنى عشرة لصاحبها صاحب الشيكات المضروبة الشهير وأعمدتها من عتاولة الوطنى الحزب. وعربان توريث مبارك وعلى رأسهم اسمه إيه ده. اللى أنا فاكره كويس. وعامل نفسى.. ناسيه
المهم.. يا سيدى
إن دول. وكل ده.. رجعوا
ولسه الحاج مرسى ما رجعش؟! ورغم إنى. والله شهيد. لست خروفا.. ولا سيسى. إلا أن الأمر. استوقفنى. وأثار الشكوك.. فى نفسى. فالتاريخ يعيد نفسه. رغم أنف المعارضين. للمقولة والمؤمنين بأن التاريخ: كائن متغير. وسبحانه وحده الذى يغير.. ولا يتغير
عاوز إثبات. على إن كله. بيعود بقوة.. لقديمه
ارجع للمحاكمات.. وللى خرجوا من السجون. زى الطبق الصينى بعد غسيله. وانظر للى.. جابوا عليهم غرامات. وقضايا. وتعويضات.. بمئات الملايين. وفى الآخر بقوا. مداينين الدولة بالملايين؟ وبص بعين ردية.. لصحابنا اللى خرجوا. من قضايا زى الشعرة.. من العجين! ولا.. بص برده. لناس تانيين. مستنيين يخرجوا من السجن. ومن أحكام بسجن مؤبد. ومن قضايا قتل كمان بس يدفعوا بالمليارات.. المرة دى ؟
عاوز كمان.. حاقولك على البلد. اللى بيحاكموا فيها. قتلة كلب ب3 سنين سجن. وبعد محاكمة عاجلة.. ما خدتش أيام. وهنيئا للكلب وولاد الكلب. وصحابه كمان؟ ويطلع الحكم. وكأنك فى بلد بتعرف الحق. على أصوله. وبتدى الغلبان.. قبل القادر حقه. بال.. مازورة أى والله......
عاوز كمان.. حاقولك. بس وحياة أبوك. خليك زى ما أنت ماشى جنب الحيط. ومفيش مانع تبقى. جوا الحيط. أو الحيطة نفسها
خليك.. زى ما أنت: صابر. قانع. متواضع. غلبان. مسكين.. بترضى بكل شىء بتقولوا لك الحكومة. واللى مالوش حكومة. ما لوش كبير. وخليك حاطط فى دماغك. إن الحكومة هى: بابا وماما وأنور وجدى كمان! بس أوعى.. تشتكى لأن الشكوى. لغير الله والحكومة.. مذلة؟ وأوعى. تفكر تتكلم عن: زيادة أسعار. ولا حتى تحريكها. فكل اللى بتجيبه الحكومة: كويس. واحمد ربنا. إنك فى الأول. وفى الآخر. لسه: عايش. بتاكل. وبتشرب. وبتتنفس
وبتزرب. فى العيال. ومحدش بيقولك: منين ولا فين ولا.. مفيش ؟!
من العدد المطبوع
من العدد المطبوع