مصطفى بكري: بقالنا أربع سنين بندبح بالمال القطري

_ قال الكاتب الصحفي مصطفى بكري، في برنامجه "حقائق وأسرار" على قناة "صدى البلد"، مساء اليوم، الخميس، إنه لا يعارض المصالحة بين مصر وقطر، إلا أنه يجد أن على قطر احترام مشاعر المصريين، ووصف مذيعي قناة الجزيرة المصريين بالخونة.
وقال: "إحنا يا جماعة مات لنا ناس، إحنا مات لنا آلاف البشر، إحنا يا جماعة شهدائنا في كل بيت، مين اللي قتل دول، مين المال اللي راح لجيوب الخونة والمجرمين، مش في مصر بس، في مصر وسوريا وليبيا وتونس واليمن، ولسة التمويل شغال، لا ده راح تركيا عشان تروح المجموعة هي هي تفتح قناة في تركيا، وأنا لا أفرق ما بين تركيا وبين الحكومة القطرية".
وأضاف: "في لندن لسة شغالة أدواتهم وآلياتهم، بعض الناس بيقولوا خلينا يا سيدي نقفل، واحنا مش ضد ده، واحنا على ثقة كبيرة إن خادم الحرمين الشريفين وأن الرئيس عبدالفتاح السيسي لديهم جدية حقيقية في لملمة الأوضاع، وكذلك الشيخ محمد بن زايد اللي زار قطر لهذا السبب".
وتابع: "لكن برضه على قطر أن تحترم مشاعرنا، عليها أن تدرك إن المصريين مش بقرار هيروحوا وقرار يجوا، وإن داخل كل بيت مصري ألم وحزن شديد، وإن الدم صعب أوي يتنسي، أيًا كان الأمر وأيًا كانت حسابات السياسة، لكن جوانا فيه غصة، أربع سنين واحنا بندبح بالمال القطري، أربع سنين واحنا بنعاني، أربع سنين وهم بيآوا الخونة، سواء كانوا اللي في القناة أو الآخرين الموجودين في قطر اللي عددهم بالمئات، دول أكلين شاربين نايميين، خونة باعوا مصر وباعوا الوطن، باعونا".