( المواطن الغلبان حسن حصاوي يغشي عليه من حين لأخر، وعندما يفيق لا يفهم ما حدث حوله من تغيرات ولكن أحيانا يجعل من يسمعه هو الذي يغشي عليه). (الشاب السلفي على المقهى الذي يرتاده حصاوي جالسا يفرك يديه). حصاوي: مالك بتفرك إيديك ليه؟ السلفي: مستني يوم 28 نوفمبر اللي جاي على أحر من الجمر. حصاوي: هيحصل إيه في اليوم ده؟ السلفي: أنت مغمي عليك ولا إيه؟ ما بتقراش الجرايد كاتبة إيه؟ حصاوي: مش واخد بالي. السلفي: الثورة هتقوم. حصاوي: لا يا شيخ دي ثورة تالتة بقى؟ السلفي: تمام والمثل بيقول التالتة تابتة. حصاوي: ربنا يوفق الجميع. السلفي: أنت الظاهر مش مصدق.. دا حقيقي. حصاوي: وأنا غلطت في إيه؟ بقول ربنا يوفق الجميع. السلفي: يوفق الجميع إزاي؟ حدد مين فيهم اللي هيقوموا بالثورة ولا اللي هيقفوا ضدها؟ حصاوي: لما أقول يوفق الجميع، يبقي بتكلم عن اللي هينتصروا فيها. السفلي: أيوه ومين في رأيك اللي هينتصر؟ حصاوي: اللي عايزه أغلب الشعب طبعا.. المهم أنت مع مين؟ السلفي: أنا؟ حصاوي: آه.. مالك أتخلبط ليه؟ أنت مع الثورة دي؟ السلفي: الحقيقة لأ. حصاوي: بس أنت سلفي، تبقى معاها. السلفي: لا كتير من السلفيين مش معاهم.. عندك الدكتور ياسر برهامي نائب رئيس (الدعوة السلفية)، بنفسه حذر المواطنين من خطر أنهم يستجيبوا (للجبهة السلفية) اللي دعت للمظاهرة دي؛ لأنها ممكن تهدم الدولة تنشر الفوضى في المجتمع.. مش كدة وبس وصرح بأن الإسلام منها برئ وحزب النور قال إنها ثورة صبيانية ولا بد من وأد الفتنة قبل وقوعها. حصاوي: لأ معلش قولي كلام واضح.. أصل أنا على نياتي وما بفهمش في السياسية، إيه الفرق بين السلفية دي والسلفية التانية؟ السلفية اللي بتدعو للمظاهرات أسمها (الجبهة السلفية) وهي تختلف تماما عن (الدعوة السلفية). حصاوي: يا سلام؟.. وإيه الفرق بينهم؟ السلفي: الفرق إن (الدعوة السلفية) تستنكر الدعوة للثورة الإسلامية اللي أطلقتها (الجبهة السلفية)، واعتبرتها محاولة لخداع الشباب السلفي من جهة والشعب المصري من جهة أخرى ثم أن.. حصاوي: (مقاطعا) لأ استنى بقى.. إيه اللي دخل الشعب المصري في الموضوع؟ هو أنت اعتبرته كله سلفي سواء كانوا جبهة أو دعوة؟ السلفي: لا دا تحذير عشان ما يسمعوش كلام الجبهة. حصاوي: ما هي الجبهة ولا الدعوة دي موجودة من مدة ولو كانوا عايزين يدخلوها كانوا دخلوها.. ولا أنت كدعوة سلفية ولا هما كجبهة سلفية اعتبرتم أن الشعب المصري معاكم أنتم الاتنين؟ السلفي: خلي بالك أننا كمان ضد الإخوان المسلمين. حصاوي: وأنتم اللي هتخلوا الشعب المصري اللي طلع في مسيرة أكتر من تلاتين مليون واحد توعوه؟ كان طلع علشانكم ولا علشانهم؟ السلفي: قصدي أقول إن دعوتنا السلفية أكدت مساندتها للدولة رافضة تلك الخطوة اللي بتحرض على العنف والصدام والتكفير وحذرت أعوانها في المحافظات من الالتفاف إلى دعوات الجبهة وجماعة الإخوان للخروج في مظاهرات للخروج يوم 28 نوفمبر. حصاوي: على كده دعوتكم هتنقذ مصر، وعلى كده الشرطة نايمة والجيش نايم والشعب واكل تاتورة.. ربنا يخليكم لمصر. السلفي: من واجبنا إننا نوعي الشعب. حصاوي: والأحزاب اللي مالية مصر مش هتنزل في انتخابات مجلس الشعب ويتوزع الفايزين على البرلمان؟ السلفي: لكن ما حدش بيحذرهم ويوعيهم زينا. حصاوي: مش دا إذا نزلتوا الانتخابات أساسا؟ السلفي: وإيه اللي يخلينا ما ننزلش؟ حصاوي: أن دستورنا يمنع أي أحزاب دينية.. يعني لا أنتم كدعوة ولا هما كجبهة ولا الإخوان. السلفي: بس احنا مش حزب..احنا دعوة. حصاوي: والشعب ما لوش دعوة بالاسم اللي تسموه لنفسكم. السلفي: بكرة تعرف احنا مين.. لما ييجي يوم 28 نوفمبر وتشوف. حصاوي: بس أنا عارف اللي هيحصل من دلوقت. السلفي: عارف إيه؟ حصاوي: لو الدعوة فشلت في مخططها ما حصلكمش حاجة، ويتقربوا للحكومة ولو الدعوة نجحت لا قدر الله تعترفوا بيهم وتقولوا جماعتنا نزلت على إرادة الشعب.. الشعب السلفي: طبعا بس.. قديمة.. العبوا غيرها. السلفي: والله ما أنا قاعد معاك تاني بعد النهاردة. (السلفي: يسرع هاربا من أمام حصاوي).
