أغرب مداخلة مع الشيف شربيني؟!

- ومعانا اتصال.. يا ست أماني
- ازيك يا شيف شيرديني.. منور الشاشة والله
- الله يخليكي يا ست الكل..أأمريني
- احنا مبسوطين قوي من الأكل بتاعك
- الله يكرمك... يا ستنا... سؤالك
- جوزي بيحب وصفاتك جدًا
- دي حاجة تقرفني... قصدي تشرفني.. اتفضلي اسألي
- البت بنت بنت بنتي بتشوفك على الشاشة بتتسرع من الفرحة
- الهي يسرع العيلة كلها من كتر الحب.. اسألي بقي
- في عندي قريبتي ما بتنامش بليل غير اما تسمع صوتك اللي مسجلاه على الموبايل رنة
- انتو عيلة مريضة واضح يا ست أماني... دي حاجة روعة... اطلبي الأكلة بقي خلصيني
- الواد ابني بيجيلو إسهال مية.. أول ما بيشوف شنبك على الشاشة بيسهل على طول من فرحته
- من فرحته ؟؟ أكيد بيسهل من اكلك اللي يجيب توحد... خلصي عاوزة تطفحي ايه ركبي وجعتني من الوقفة
- الولية الشغالة اللي بتجيلي قالتلي أنها بتعمل اكلة اسمها المطروش المقلي في تحاتيح اللحمة... ممكن المواصفات يا شيف شيرديني.
- المطروش المقلي في تحاتيح اللحمة.. حاضر حنقول المقادير والطريقة.. شكرا للست أماني
- لالا ثواني في حاجة مهمة
- يا دي اليوم الأسود.. عاوز تعرفي مقادير الجزم المدخنة على دماغك ؟؟
- أمي بتحب تسريحة شعرك قوي مع النضارة كعب الفيل اللي بتلبسها يا شيف شيرديني
- سلميلي عليها وقوليلها بيخوفو بيا العيال عشان يناموا باليل...
- خالتي كمان بت....... تيت تيت تيت
- الحمد لله.. الاتصال انقطع.. ناخد اللي بعده... الست فهيمة.. ونقول الوو...