ليه جورج كلوني ما اتجوزش مصرية؟!

أنا مقدر مشاعرك وعارف إنك شايفة إن أمل علم الدين مش أحسن منك في حاجة...
- بس اتخيلي جورج كلوني راكب عربية ليموزين لانسر بومة، مواصفات خليجي، ومستنيكي عند الكوافير وقاعد ينشف عرقه بمنديل مفرول من الهري.
- اتخيلي الراجل اللي خد توجيه من أجمد مخرجين في العالم بياخد توجيهات من أستاذ عوني المسئول عن قاعة اللؤلؤة أو البرجولا (ليلتي).
- اتخيليه وهو بيرفع الطرحة ويبوسك في قورتك فيطلع في بقه أثر بودرة جريماس المائية.
- اتخيليه في وسط زفة الحصان والبخور وهو بيزغرلك وقافش عليكي " احنا مش اتفقنا على زفة دمياطي!".
- اتخيلي منظرك قدامه وهو شايف خالك اللي لابس بدلة خضرا وهو بيخيب بحماس زايد ساعة الزفة رغم إن الفرح لسه مابدأش.
- اتخيليه وهو بيمضي على الجيست بوك وانتوا داخلين وواحد صاحبه كاتبله فيه "ابقى ارفع راسنا يابن الموكوسة".
- اتخيليه وهو بيكح صمام قلبه بعد ما "أفور" من "شو" الليزر والدخان.
- اتخيلي إحباطه وهو بيسمع أسماء الله الحسنى بتاعة هشام عباس وفي ناس بتسقف في حتة الطبلة اللي في الآخر.
- اتخيلي إحباطه من "يونيفورم" الشباب بتوع شو المشاعل.
- اتخيليه بعد ما قعد الراجل بتاع شو الشربات يقنعه بتبديل الكاسين، وفي الآخر ييجي يشفط يلاقي شربات فراولة-قها.
- اتخيلي بدلته الأرماني ومدفع الورق بيضرب جنبها.
- اتخيلي صوره وهو صغير معمول عليها مونتاج ردي على أغنية خدني بين إيديك.
- اتخيلي دي جي وزة بتاع الفرح وهو بيقول "أصحاب جورج يجو كدا وأصحابك يروحوا الناحية التانية".
- اتخيليه حواليه شباب عرقان بيرقص بسكينة من بتوع الأكل على أغاني مهرجان انتش وارعش.
- اتخيلي الشباب دول وهما بيدوله شرايط سومادريل وباركينول، وبيعملوله حركات مش تمام قال يعني بيوجبوا معاه واجب عرسان.
اتخيلي أمك(حماته) وهي بتلومه ازاي وجبة (الباتيه+2 جاتوه+2 باتون ساليه وبولة كرسبي) مازودش عليها باكو كمان وخد سندوتش جبنة رومي+لحمة باردة.
........................
........................
اتخيلي كده .... ماينفعش صح !
يالا روحي باركي لأمل من غير حقد.