نصايح دكتور نسا

لكل ست جاية عندى العيادة رجاء قرأة التعليمات واتباعها بدقة وإلا مش هكشف عليكى!
- اللي لسة متجوزة: مش لازم على فكرة أول الراجل ما يعدي جنبك تبقي حامل.. عادي جدًا يعني تقعدي كام شهر.. حاولي تتبسطي بيهم.. متلهوجة على إيه جتك خيبة
- اللي جاية تركب "لولو" هو اسمه لولب على فكرة يعني عشان انا باتخنق.. وما بيتربطش ولا باتبت عليه عشان انا مش ميكانيكي سعادتك.. وهو أصلا مش شقي قوي زي ما سمعتي.. يعني ولا بيسرح عالقلب ولا حيطلع من بؤك.. آه.. خالتك ومرات اخوكي مابيفهموش.. ايوة ايوة صدقي
- الحامل اللي بتروح تشور أي حد ويوصف لها علاج وتاخده.. ماتجيش تسألني ينفع مع الحمل ولا لأ.. انا باقاوم شيطاني بالعافية اني أقول لك طب ما ينفعش وريني يا فالحة حتعملي إيه بقي.. اسأليني "قبل" ما تاخدي أي دوا مش بعد..
- بالنسبة للأخ الزميل الصيدلي.. رأيك في العلاج اللي باكتبه آخر اهتماماتي على فكرة.. يعني عارفة أن الابيلات دوا ضغط والسيدوفاچ دوا سكر والپرجنيل بيدوه للرجالة.. الخ الخ من ملاحظاتك اللي مش عارفة كنت حاعيش من غيرها ازاي.. اصرف الدوا وانت ساكت.
- نمرة تليفوني اللي معاكو دي للضرورة.. الضرورة! فمع احترامي الشديد لتساؤلك تلبسي پيچاما بأستك مع الحمل ولا لأ أو تليفونك الساعة 2 الفجر عشان تسألي إذا ينفع تصبغي شعرك والحاجات دي فأنا أسفة أصدمك وأقول لك الحقيقة المرة انها لا تندرج تحت بند الضرورة.. تصوري؟!!!
- الدكتور بني ادم برضه على فكرة. بينام ويعمل پيپي واحيانا بيتهف في مخه وياخد دش.. مش لازم يطلع يلاقي فيه 35 ميسد كول.. حاولي تتخيلي ولو لحظة أنه يمكن مثلا كان مزنوق؟
- الحالة اللي بتقعد عالنت.. انا فعلا بعد 14 سنة خدمة في ثانوي مستنية المعلومة اللي قريتيها في منتدي فتكات عشان اعرف أعالج حالاتي.. ارجوكي.. روحي تابعي مع فتكات
- بالنسبة لشعر العيل اللي بيعمل حموضة!! رأس البيبي بتبقي تحت على فكرة.. مالهاش ايوتها علاقة بالمعدة.. وحاقعد ربع ساعة كاملة اشرحلك تأثير الحمل على صمام المرئ والارتجاع.. لو المرة الجاية جبتي سيرة كلام ماما عن شعر العيل تاني حاحدفك بحاجة!
- الحاجات السخنة مش بتسقط.. ماكانش حد غلب
- الأخت اللي بتيجي مع الحالة ومالهاش تلاتين لأزمة... انا باجاوب على ال500 سؤال اللي حالتي بتسألهم وماباشتكيش وباستحمل تدخلك في وسط الكلام ذوق مني مش اكتر إنما مش لازم أول ما الحالة تدخل اوضة الكشف أرد كمان على تساؤلاتك بخصوص بنت أختك اللي في الإمارات ولا مرات ابنك التانية اللي متابعة مع دكتور في مصر مش مريحها.. تحبي اديكي بباقي الكشف لبان كمان؟
- الباشمهندز جوز المدام الحامل.. سعادتك انا اخترت نسا أصلا عشان ماتعاملش مع رجالة.. يعني مخنوق قوي انها في البيت بتشتكي من أعراض الحمل وبتدخل ضارب لي بوز وقرفان قوي انها تعبانة والكلمة الشهيرة "شوفي لنا حل" دي؟ الحل ماكنتش اتشاقيت ياخويا.. إنما خلاص أهي حامل وشايلة البطيخة على قلبها الغلبانة.. مش عاجبك كمان انها تشتكيلك من غممان النفس ولا رجليها اللي ورمت ولا انها بقت تقيلة؟! روح اشتكي لحد غيري انا حاسمعك كلام يضايقك... بلاش مرقعة بقي دانتو لو جالكو زكام بتعلنوا الطوارئ....
- وانا باعمل السونار... مش لازم كل زيارة تسألوني هو لسة ولد ولا هي لسة بنت!!!!! انا اعرف واحد نام وصحي لقي نفسه لسة راجل برضه على فكرة... بتحصل يعني احيانا!!! ومش حيغيّر رأيي في نوع البيبي الحلم اللي حلمته طنت فلانة انها حتجيب بنت مش ولد ولا طنت علانة اللي بصت عالبريمة اللي في شعر اخوه وقالت اللي جاي بنت الخ الخ من هذا الفلكلور اللطشيف.... وبالنسبة للقفشة بتاعة هو البيبي لون عينيه إيه ولا شعره طويل ولا شبه مين فينا...... أوكي............ هأ هأ هأ.... خلاص؟
- واخيرًا... وانتي جاية تولدي... ابوس رجل أمك (و حماتك).... بلاش بيض مسلوق وملوخية الرحمة حلوة!