جواز مصري

1. إحنا دايما سابقين بخطوة يعنى المرتبطين بيتعاملوا مخطوبين والمخطوبين بيتعاملوا إنهم متجوزين والمتجوزين بيتعاملوا إنهم مطلقين.
2. الست ملهاش غير جوزها وعيالها وبس.
3. عشان بمجرد إنك ولد ممكن تعمل أي حاجة ومحدش يحاسبك.
4. صحاب العريس جايين يظبطوا صحاب العروسة والقرايب جايين ياكلوا وينتقدوا الفرح.. العريس والعروسة ضحايا.
5. الخطوبة الولاد بيعتبروها حاجة للتسلية يعنى مثلا مينفعش واحد يبقى متضايق وهو خاطب يا إما الأراجوزة إللى خاطبها تبقى مقصرة.
6. الجواز نص الدين..... والشقة النص التانى.
7. كل حاجة في مصر ماشية بالحب ؛ إلا الجواز.
8. الزوج المصرى متعمد دايما إنه يظهر إن الجواز قرف وإن مراته منكدة عليه ومقصرة في حقه قدام الناس حتى لو هما كويسين سوا.
9. البنات عندهم هوس وخوف مرضي من الحسد والعين لدرجة إنها ممكن تتخطب وتتجوز وتخلف في السر وبعدين تطلّق فتنزل خبر طلاقها في الأهرام.
10. الرجالة عايزين بنت خجولة.. وبتعجبهم جدّا الجريئة.. عايزين واحدة محترمة.. ويمشوا معاها يبصوا على اللى بتعجبهم في الشارع وبعدين يقولك البنات هما المجانين!
11. وفي جواز الصالونات بقى أم العريس هي اللي تيجي تشوفك الأول.. عشان تعاينك قبل ما تجيب ابنها.
12. جواز الصالونات ماشى بالمبدأ ده: "لو جنان انك تتجوز حد انت متعرفوش على أمل إن الحب بييجى بعد الجواز" #اتجنن:D
13. الفايدة الوحيدة من الجواز هو أنه هيخليك تقدر قيمة عدم الجواز.